Oé-Cusse, Kinta-feira 18/04/2024
Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos akompaña husi Diretór Nasionál Ensinu Sekundariu Jéral Sr.Benjamin da Cruz, entrega ekipamentu Banda Tanbór ba eskola Sekundária Jerál Palaban kadeira no meza ba eskola Kafé, ekipamentu Informátiku ba eskola Sekundária Katólika Nossa Senhora de Fátima Padiae Oé-Cusse
Hafoin entrega ekipamentu hirak-ne'e, Diretór Eskola Sekundária Katólika Nossa Senhora de Fátima Padiae Pe. Carlos de Deus deklara katak, eskola sente orgullu tebetebes, tanba iha tinan barak nia laran Estadu foin loke matan ba eskola Katólika Nossa Senhora de Fátima Padiae, agradese tebetebes ba Ministériu Edukasaun liuhusi Sekretáriu Estadu ESJESTV mai entrega ona ekipamentu Informátika ho unidade 8 no meza 300 mai eskola ida-ne’e.
"Ami simu ekipamentu sira ne'e sei tau responsabilidade másimu ba sasán hirak-ne'e ba estudante nia di'ak, ekipamentu hirak-ne'e la'ós ba profesór/a sira nian, maibé rai iha eskola hodi estudante bele halo prátika", katak Diretór ne'e.
Fatin hanesan Sekretária Rejionál ba asuntu Edukasaun no Solidariedade Sosiál Sra. Inácia Tamele hateten, agradese tebetebes ba Exelénsia Sekretáriu Estadu ESJESTV ohin loron bele lori ekipamentu balun mai to'o iha eskola tolu iha Raeoa, bele responde ona proposta ne'ebé mak Rejionál simu husi eskola durante ne'e.
"Husu ba eskola hirak ne'ebé mak hetan ekipamentu ne'e atu utiliza ho responsabilidade másima, tanba ekipamentu hirak ne'ebé mak to'o ona eskola ne’e, eskola ninia husu estudante no Dirijente eskola nian atu utiliza ho kuidadu", informa Sekretária Rejionál Inácia
Fatin hanesan Exelénsia Sekretáriu Estadu ESJESTV Sr. Domingos Lopes Lemos reafirma, ohin ekipa mai vizita eskola tolu iha Raeoa, lori ekipamentu Informátika no Tanbór banda nian ba eskola sira.
"Apoiu hirak-ne'e sei kontinua ba eskola sira ne'ebé mak presiza nesesidade tebetebes tulun husi Ministéiru Edukasaun nian parte Ministériu Edukasaun nian nafatin fó tulun tuir kbi'it Ministériu Edukasaun nian", katak Governante ne'e.
Antes ne'e Sekretáriu Estadu ESJETV ho ekipa entrega ona ekipamentu Informátika, Kadeira, Meza no Tanbór banda nian ba eskola sira iha Munisípiu seluk.
Ekipamentu hirak ne'ebé mak Exélensia Sekretáriu Estadu ESJESTV ho ekipa entrega ba eskola Sekundária Jerál Palaban Drum Band pakote ida, Komputadór unidade 8 no meza 300 ba eskola Sekundária Jerál Katólika Nossa Senhora de Fátima Padiae, kadeira, meza 150 unidade ba Eskola CAFE Oé-Cusse
Enkuantu Sekundária Jerál Palaban Oé-Cusse estudante hamutuk 1.126, kompostu husi Profesór 22, eskola Sekundária Katólika Nossa Senhora de Fátima Padiae estudante Ensinu báziku hamutuk 300, estudante Ensinu Sekundáriu Jerál hamutuk 91, Profesór hamutuk 6.
#jornalistarita
#MédiaME
