Ministériu Edukasaun liu husi Diretora Jeral Planu Polítika, inkluzaun no informátika (DG PPII) Sra. Odélia das Dores Ung Martins no Diretór Jeral Edukasaun Pré-Eskolár, Ensinu Báziku no Ensinu Rekorente (DG EPEBER) Sr. Apolinário Serpa Rosa hamutuk ho Reprezentante UNICEF iha Timor-Leste Sra. Patrizia Di Giovanni, Embaixador Japaun ba Timor-Leste Sr. Tetsuya KIMURA entrega bloku sentina 8 ne'ebé foin hari’i no bloku sentina 6 ne'ebé hadi'a ona iha eskola 8 iha munisípiu Lautem no Manufahi.
Iha intervensaun DG PPII Odélia das Dores Ung Martins hateten, ohin loron iha serimónia importante tebe-tebes mai ita, tanba Governu Japaun tulun tebes Governu Timor-Leste liuliu iha área edukasaun ninian no eskola barak mak Governu Japaun halo ona iha teritóriu Timor laran tomak.
"Ha'u hanoin fasilidade ne'ebé prepara atu tulun liu alin feto sira tanba feto mak presiza atu asesu ba bee mos barak liu kada fulan, ho maneira ijiéniku, no labele fó impaktu ba prosesu aprendizajen para iha fulan-fulan" Dehan DGPPII.
Reprezenta Ministériu Edukasaun DGPPII Sra. Odelia das Dores Ung Martins, hatoo agradese tebes ba UNICEF nia prezensa nomos Embaxador Japaun sira nia povu prontu duni atu kontribui osan husi taxa ne'ebé sira iha, nune'e bele tulun fali povu Timor-Leste. Tanba ida-ne'e buat ne'ebé ita hetan ona presiza kuida ho di'ak.
