MINISTÉRIU EDUKASAUN HALA’O OBSERVASAUN URJENTE BA ESKOLA EBF RUMBIA, CAICOLI
Dili, Kuarta-Feira, 23/08/2023 - Ministériu Edukasaun reprezenta husi Asesór Nutrisaun Gabinete Ministra no Diretór Nasionál Asaun Sosiál Eskolár no Asuntu Sanitária hala’o vizita kortezia ba eskola Ensinu Báziku Filiál Rumbia hodi konfirma informasaun ne’ebé fó sai husi média balun katak estudante sira lamenta ho poluisaun ka ahi su’ar ne’ebé kauza husi koziñeira merenda eskolar nian.
Iha vizita ne’e, Diretór Nasional Asaun Sosiál Eskolár no Asuntu Sanitária Joaquim Martins informa, objetivu vizita ida ne’e atu haree liubá kondisaun dapur ne’ebé implementa merenda eskolar relasiona ho informasaun ne’ebé média balun públika katak ahi suar maka’as fo afeita tebes ba estudante sira nia saúde.
"Ohin observa direitamente no rekuñese loos duni katak iha tempu hirak liubá dapur besik duni eskola, maibé ita nia kordenadora eskola kordena ho koziñeira sira hodi muda ona distánsia dapur hodi labele prezudika ba estudante sira nia saúde banhira aprende", dehan Diretór.
Iha fatin hanesan Kordenadora Eskola EBF Rumbia Jacinta D. C. Leão informa, loos duni antes ne’e ahi su’ar tama ba sala laran, maibé dadaun ne’e lae ona, tanba dapur ne’ebé uza ba te’in muda dook ona husi fatin aprende.
"Agora labarik sira aprende ho di’ak ona no sei kontinua servisu hamutuk ho diretór no inspetór atu muda husi ai sunu ba fugaun", dehan Kordenadora.
Enkuantu EBF Rumbia filial husi Ensino Básico Central (EBC) Faról lokaliza iha aldeia Sakoko, Suku Rumbia, Postu Vera-Cruz, Dili ho totál profesór/a 16 no estudante hamutuk 636.
