MINISTÉRIU EDUKASAUN APOIU MATERIÁL KONSTRUSAUN BA EBF FATUHADA
Díli, 17/11/2023 – Ministra Edukasaun liuhusi Diretór Asaun Sosiál Eskolár no Asuntu Sanitária (DNASEAS) Joaquim Martins hamutuk ho ekipa fó apoiu matéria konstrusaun hanesan kalen Zingko unidade 375, Kalen Lizo unidade 50 no pregu Xapeo kg 10 ba Ensinu Báziku Filial Fatuhada, sexta-feira ne’e.
Iha entrevista ne’e, Diretór DNASEAS Joaqum Martins hateten, haree kondisaun sala aula ne’ebé grave tebes mak eskola rasik halo pedidu ba Ministériu Edukasaun hodi bele apoiu material atu bele taka fila-fali uma kakuluk, nune’e estudante sira bele tuir prosesu aprendijazen ho di’ak.
“Ne’e apoiu emerjénsia no téknikamente ami observa kondisaun balun di’ak hela, tanba ne’e sei mai fila-fali hodi halo verifikasaun mak bele apoiu tan, tanba koko sei taka hotu, infelismente husi apoiu ohin ne’e para troka dadauk ona kakuluk sira”, dehan Diretór DNASEAS.
Iha fatin hanesan Koordenadór Ensinu Báziku Filial Fatuhada Domingos Amaral hateten, sei konvoka reuniaun ho inan-aman atu bele taka kalen hodi bele satan udan, nune’e estudante sira bele tur iha mahon hodi simu matéria.
