Díli – Loron Kinta-Feira, 03 Outubru 2024
Sua Exelénsia Ministra Edukasaun Dra. Dulce de Jesus Soares no Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hamutuk ho Dirijente sira Ministériu Edukasaun, manorin no estudante husi Pré-Eskolá Sagrada Família Vila-Verde, presta omenajen ba estudante pré-eskolár na’in 23 no manorin na’in 3 ne’ebé hakotu iis iha Bus laran hafoin hetan asidente iha provínsia Pathum Thani Bangkok Tailándia.
Iha entrevista, Sua Exelénsia Ministra Edukasaun Dra. Dulce de Jesus Soares, hateten, Ministériu Edukasaun ohin dader foti oportunidade ida ne’e hodi fó omenjen ba estudante pré-eskolár na’in 23 no profesora na’in 3 iha Tailándia, ne’ebé lakon sira-nia moris bainhira fila husi eskola no iha dalan Bus eskola nian ahi-han.
“Horseik sira ba eskola no sira fila-fali ho Bus eskola nian, ahi-han no la konsege salva estudante oan sira no manorin na’in 3 ne’e nia moris. Manorin sira koko atu ajuda sira, maibé la konsege salva”, dehan Ministra Edukasaun.
Governante ne’e hatutan, Ministériu Edukasaun iha mós servisu parseria ho Prinseja Tailándia Maha Chakri Sirindhorn hodi fó apoiu barak ona mai Ministériu Edukasaun no la iha buat ida atu fó fila-fali, maibé simplesmente hamutuk ho estudante no manorin sira hodi hatudu sentidu kondolénsia ba família no mós ba Ministériu Edukasaun Tailándia.
#MédiaME
