Díli – Loron, Sexta-Feira, 04 Outubru 2024
Sua Exelénsia Ministra Edukasaun Dra. Dulce de Jesus Soares no Sua Exelénsia Sekretáriu Estadu Ensinu Sekundáriu Jerál, Ensinu Sekundáriu Tékniku Vokasional, Sr. Domingos Lopes Lemos no Prezidente Komisaun Funsaun Públika, Sr. Agostinho Letêncio de Deus hamutuk ho Primeiru Ministru Kay Rala Xanana Gusmão fó posse ba profesór Bolsa Kandidatu faze daruak hamutuk na’in 665, iha Salaun Ministériu Finansas.
Iha konversa, Sua Exelénsia Primeiru Ministru Kay Rala Xanana Gusmão, hateten, imi mak sei sai inan no aman ba nasaun ida ne’e, tanba iha imi-nia matenek, komprimisiu no dedikasaun ba iha misaun ida ne’e mak ita hotu bele iha serteza katak Timor-Leste sei ba oin tanba jerasaun sira ne’ebé mai liuhusi imi sei iha kbi’it bo’ot liután nafatin atu lori rai ida ne’e ba oin.
“Ha’u haree ba imi-nia oin idak-idak, ha’u iha esperansa bo’ot tebe-tebes, tanba saida mak imi hetan, la’os servisu, saida mak ohin imi simu, ne’e misaun bo’ot ida, ne’e mak tenki tau iha imi-nia ulun, imi-nia hanoin, imi-nia laran. Institsaun hotu-hotu iha estadu-nia laran iha área rua saúde no edukasaun, ne’e misaun, maibé misaun edukasaun ne’ebé ohin imi simu bo’ot liu saúde”, dehan S.E. PM.
Xefe governu ne’e hatutan, misaun ne’ebé atu fó kona-ba saida mak imi hatene hodi fó ho laran no domin, tanba ne’e misaun ne’ebé imi halo, Timor bele iha esperansa bo’ot ba futuru mai ne’e, sei la’o di’ak liután ho matenek barak tán, ho ema ne’ebé iha atetude di’ak, espíritu nasionalista di’ak, sidadania bo’ot hodi lori rai Timor ba oin, tanba ne’e, hakruk ba imi, respeita imi ho domin tomak.
Iha fatin hanesan, Sua Exelénsia Ministra Edukasaun, Dra. Dulce de Jesus Soares, hateten, sente orgullu, tanba konsege duni hetan balansu entre asegura profesór sira-ne’ebé di’ak liu ba ita-nia oan sira-ne’ebé hela dook liu no vulneravel liu, no iha tempu hanesan asegura katak eskola sira seluk ne’ebé lakon manorin sira, tanba Bolsa Kandidatu, iha tempu atu troka fali manorin sira-ne’ebé treinu ho dilijénsia no efetividade durante tinan hirak.
“Funsionáriu públiku sira mak mákina governu nian – partidu polítiku sira bele sa’e no tun, maibé povu nia nesesidade moris ho seguru, hakmatek no kontente sei iha nafatin, no timoroan sira hotu iha direitu ba governu ne’ebé servisu atu fornese servisu sira-ne’e ba ema hotu-hotu”dehan S.E. Ministra Edukasaun.
Governante ne’e hatutan, Ita-Boot sira foin tama nu’udar membru Funsaun Públiku, nune’e imi jura atu hala’o devér sira hotu ho lealdade no servisu ho responsabilidade no dedikasaun ba labarik sira hotu nia di’ak, tenke tane aas devér solene ida-ne’e, tanba ita-nia futuru nu’udar nasaun dezenvolvidu depende ba natureza edukasaun ne’ebé hanorin ohin loron.
Aleinde ne’e, Prezidente Komisaun Funsaun Públika, Agostinho Letêncio de Deus, hateten, dadus profesór kolokasaun ne’e reprezenta pasu pozitivu ida no estratejia ida iha ámbitu implementasaun polítika reforma obrigatóriu, haree husi kualidade velise ba kargu persoál sira iha Funsaun Públika ne’ebé konstitui ho korrente ida ba planu reforma jentaun rekursu umanu administrasaun públika nian ba periodu 2023 to’o 2028.
“Mákina administrasaun estadu nian oras ne’e tuan ba beibeik ho forsa traballu sira ne’ebé kada loron rejista idade avansadu, tuir projesaun dadus reforma nian pesoal ho totál 5345 atinji ona tinan 60 no entre sira ne’e profesór mak okupa 60%”, dehan Prezidente CFP
Ho ingresu foun ba kareira dosente ne’e, konstitui etapa ida ne’ebé no mekanizmu ida atu hafoun idade forsa traballu administrasaun públika nian hodi bele hasa’e liután kualidade di’ak iha setór edukasaun nian.
#MédiaME
