Díli – Loron, Tersa-Feira, 01 Outubru 2024
Sua Exelénsia Ministra Edukasaun Dra. Dulce de Jesus Soares no Sua Exelénsia Sekretáriu Estadu Ensinu Sekundáriu Jerál no Tékniku Vokasional Sr. Domingos Lopes Lemos hamutuk ho dirijente sira Ministériu Edukasaun nian hala’o diálogu ho Eis-Profesór Kontratadu 2023. Iha Salaun Konferénsia Ministériu Edukasaun, Vila-Verde.
Iha entrevista, Porta-Voz Ministériu Edukasaun, Sr. Filipe Rodrigues, hateten, ohin halo diálogu ida entre Ministériu Edukasaun ho Eis-Profesór kontratadu 2023 hodi ko’alia kona-ba interpretasaun legál sira ligadu ho profesór sira nia ejizénsia no interpretasaun balu mak seidauk kona malu, maibé loke nafatin oportunidade atu ministériu ho parte eis-profesór kontratadu sira atu bele kontinua bele hasoru malu.
“Hakarak mós informa ba ita bo’ot sira katak, Sua Exelénsia Primeiru Ministru mós manda ona karta mai Sua Exelénsia Minstra i karta ne’e responde ona, tanba ne’e ita hein solusaun ba oin”, dehan Porta-Voz Ministériu Edukasaun.
Iha fatin hanesan, Porta-Voz Eis-Profesór Kontratadu 2023, Sr. Agostinho Pinto, informa, Enkontru ohin ne’e hanesan diálogu inisíu ida, la signifika katak hetan kedas rezultadu, maibé nafatin kontinua diálogu no aprosimasaun
“Enkontru ohin la’o di’ak tebes, tanba parte hotu-hotu hato’o ninia opiniaun no interpretasaun ba baze legál sira no Sua Exelénsia Ministra mós ko’alia katak sei fó tán oportunidade hodi loke diálogu hodi bele hetan solusaun ida ne’ebé justu ba profesór sira”, dehan Porta-Voz Eis-Profesór Kontratadu 2023.
#MédiaME
