Díli – Tersa-Feira, 30 Abríl 2024
Ministériu Edukasaun liuhusi Diretór Jerál Pré-Eskolár, Ensinu Báziku no Rekorente Sr. Apolinário Serpa Rosa no Diretora Rekursu Umanu Sra. Anita Tavares Martins enkontru ho Diretór Servisu Edukasaun no Superintende Munisípiu sira inklui RAEOA hodi halo preparasaun atu koloka profesór sira ne’ebé pasa ona iha teste hamutuk 568 bazeia ba kuadru pesoál ne’ebé iha. Konferénsia ne’e realiza iha Salaun Konferénsia Ministériu Edukasaun Vila-Verde.
Iha konferénsia ne’e, Diretór Jerál Pré-Eskolár, Ensinu Báziku no Rekorente Sr. Apolinário Serpa Rosa hateten, hafoin halo tiha diskusaun Diretór Servisu Edukasaun no Superintende Munisípiu sira sei fila-fali ba munisípiu hodi haree, tarde liu segunda-feira sei haruka fali dadus mai Diresaun Rekursu Umanu hodi halo ona despasu ba profesór sira iha eskola sira ne’ebé krítiku liu.
Iha fatin hanesan, Diretora Rekursu Umanu Sra. Anita Tavares Martins hateten, Ministériu Edukasaun presiza halo diskusaun ida ne’e hamutuk ho Diretór Servisu Edukasaun no Superintende Munisípiu sira atu bele kompriende didi’ak situasaun sira ne’ebé krítiku liu atu bele halo ezersísiu hodi koloka kandidatu sira ne’ebé pasa ona iha teste ne’e.
“Preparasaun daudauk ne’e sei haree ba kuadru pesoál ne’ebé iha hodi halo analiza liu-liu ba eskola sira ne’ebé krítiku liu atu bele priense uluk ba eskola sira ne’e, tanba ne’e Diretór Servisu Edukasaun no Superintende Munisípiu sira sei haree didi’ak iha terrenu no halo kolokasaun hafoin enkamiña mai fali Ministériu hodi koloka bazeia ba nesesidade”, dehan Diretora Rekursu Umanu.
Diretora ne’e hatutan, halo kolokasaun uluk ba profesór sira ne’ebé liu ona, hafoin ba fali preparasaun ba iha segunda volta ba teste bolsu kandidatura.
#jornalistapauladelgado
#MédiaME
