Díli – loron Sábadu, 21 Setembru 2024
Sua Exelénsia Ministra Edukasaun Dra. Dulce de Jesus Soares no ekipa husi Ministériu Edukasaun hamutuk ho kolega no família matebian partisipa seriónia fúnebre ahu-kadesan Dra. Helen Mary Hill nian iha Semitériu Santa-Kruz, hafoin remata misa solene iha kapela Semináriu Menór Balidi, Díli.
Hafoin remata tiha serimónia fúnebre, Sua Exelénsia Ministra Edukasaun Dra. Dulce de Jesus Soares, hateten, Dra. Helen Hill hanesan ema ida ne’ebé iha nia paixaun no atensaun, hakerak tebes moderniza eduakasaun iha Timor-Leste atu oinsá timoroan sira hetan edukasaun ho kualidade ho maneira ida simples, maibé to’o ba povu hotu nia ona.
“bainhira ha’u iha oportunidade servisu iha governu, konvida Dra. Helen hodi ajuda iha Ministériu Edukasaun hodi halo revizaun ba kurríkulu ensinu superior nian no kontinua ba revizaun kurríkulu ensinu sekundáriu jerál no tékniku vokasonál, maibé sei iha prosesu no lakonsege finaliza, maibé Dra. Helen hakerek tiha ona informasaun barak tebés hodi uza hanesan baze ba dezenvolve kurríkulu iha tempu tuir mai no nia hakarak tebes moderniza edukasaun iha Timor-Leste no sempre esforsu atu envolve teknolojia ba joven sira atu aprende.
Iha fatin hanesan, alin husi matebian, Ian Hill, hateten, Dra. Helen Hill bainhira sei joven, nia hola parte iha atividade sira barak hodi hahú aprende kona-ba oinsá atu harii rede no dezenvolve nia abilidade hodi luta ba justisa sosiál.
“Helen nia hakarak rasik hodi lori ninia ahu-kadesan mai Timor-Leste, ida ne’e ba ema ne’ebé konstantemente halo ninia viajen dook husi fatin ida ba fatin seluk hodi dook husi uma no hetan fali uma foun ida iha komunidade Timor-Leste, ne’e hanesan nasaun ne’ebé nia hadomi no nia mate husik hela legadu naruk kona-ba luta ne’ebé nia halo”, dehan alin husi Matebian, Ian Hill.
Rekorda fali katak, iha loron sexta-feira kalan ne’e, Sua Exelénsia Ministra Edukasaun Dra. Dulce de Jesus Soares hamutuk ho ekipa husi Ministériu Edukasaun no kolega, família husi matebian Dra. Helen Mary Hill nian partisipa iha kalan reflesaun konta istória kona-ba matebian nia konatribuisaun tomak ba nasaun Timor-Leste, bainhira nia sei moris.
#MédiaME
