Manufahi, Kuarta-feira, 18/09/2024
Xefi Gabinete Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Napoleão de Aráujo Santos Lima hamutuk ho Exelénsia Sekretáriu Estadu SEFOPE Interino Sr. Mateus W. do Santos Tallo halo abertura feira kona-ba karreira no edukasaun tinan 2024 iha salaun Administrasaun Munisípiu Manufahi.
Iha intervensaun, Xefi Gabinete Sekretáriu Estadu ESJ-ESTV, Sr. Napoleão de Aráujo Santos Lima, hateten, apresia tebes ba programa sira ne’ebé SEFOPE halo ne’ebé mak importante tebes hodi prepara joven sira atu fahe informasaun ne'ebé hola parte iha estudante sira bele hahú no eskolla atu hahú no deside no prepara-an antes hatama ba merkadu traballu.
Xefe gabinete sekretáriu estadu ne’e mós enkoraja nafatin estudante sira antes atu hakat ba merkadu traballu tenki prepara-an ho di’ak hodi nune’e bele halo kompetisaun iha merkadu servisu nian.
Iha fatin hanesan Sekretáriu Estadu SEFOPE interinu Sr. Mateus W. Tallo hateten, previlegiu boot tebes hamutuk hodi selebra eventu ohin ninian liliu ho foin sa’e sira no mos entidade hotu iha Munisípiu Manufahi hodi hanoin hamutuk oinsa bele buka oportunidade formasaun no kareirra ne’ebé imformadu ba foin sa’e sira atu hili dalan di’ak no loos tuir interese abilidade no mos koñesementu.
"wanhira ita nia setór pribadu sira produtivu liutan, investimentu edukasaun no saude sei forma forsa traballu ida ne’ebé di’ak liutan no abilidade a’as hodi nune’e timor-oan sira bele kontribui di’ak liutan ba kresimentu ekonomia”, hateten governante ne’e.
Iha serimónia abertura ba feira ne'e hetan partisipasaun mós husi Diretór Jerál SEFOPE, Prezidente Autoridade Munisípiu Manufahi Komandate PNTL Munisípiu Manufahi, Komandante F-FDTL Postu Betanu, Reitor Institutu Politekniku Betanu(IPB), Diretór servisu edukasaun Munisípiu Manufahi no Dirijente sira.
#MédiaME
