Díli – loron, sexta-feira, 20 setembru 2024
Sua Exelénsia Ministra Edukasaun partisipa iha aniversáriu loron INTERFET nian ba dala-25 no tau ai-funan, hodi hanoin hikas fali INTERFET nia prezensa iha tempu difisil ne’ebé povu maubere hasoru. Serimónia aniversáriu ne’e realiza iha edifísiu CCLN Comoro, Dili.
Iha ámbitu komemorasaun aniversáriu loron INTERFET ne’e, Sua Exelénsia Ministru Asuntu Kombatente Libertasaun Nasionál Gil da Costa “Oan Soru”, hateten, komemorasaun loron INTERFET ne’e hodi agradese ba povu maubere nia luta durante tinan 24 nia laran, husi prosesu naruk mak akontese loron 30 agostu nomós akontese 20 setembru, ho laran tomak hakarak agradese ba eventu istóriku sira ne’e, tanba prezensa UNAMET no INTERFET tama iha situasaun ne’ebé difisil ba ami nia luta.
“Rezultadu loron 4 setembru ne’ebé anunsia, ami-nia povu iha Timor-Leste nia uma ahi su’ar komesa sa’e, komesa mate no halai. Rezultadu sira ne’e hotu liuhusi divizaun Sekretáriu Jerál ONU ninian no komunidade internasional bele lalais no INTERFET marka prezensa no ohin selebra ba dala-25, hodi hapara netik ahi su’ar no mate ne’ebe akontese husi rezultadu konsulta popular 30 agostu no anunsiu rezultadu 4 setembru, tanba ne’e, lori povu nia naran hakarak agradese ba ita bo’ot sira hotu ne’ebé, mai hala’o knaar iha Timor-Leste. ”, dehan MACLN.
#MédiaME
