Liquiça – Loron Tersa-Feira, 23 Abríl 2024
Sua Exelénsia Ministra Edukasaun Dra. Dulce de Jesus Soares hamutuk ho Embaixadora Portugal iha Timor-Leste Sra. Manuela Bairos partisipa iha serimónia entrega sertifikadu ba formandu Lian Portugés hamutuk na’in Ualunulu resin tolu (83) iha nível B1, serimónia ne’e realiza iha Eskola ESG Públiku Nº 1 Liquiça-Vila.
Iha entrevista S.E. Ministra Edukasaun Dra. Dulce de Jesus Soares hateten, projetu ida ne’e hanaran Pro-Portugés ne’ebé halo kooperasaun ida entre Ministériu Edukasaun ho governu Portugeza liuhusi Institutu Camões ne’ebé mak hala’o tinan barak ona no ohin profesór hamutuk na’in 83 mak pasa, kompostu husi Ensinu Pré-Eskolár, Ensinu Báziku nomós Ensinu Sekundáriu.
“Ministériu Edukasaun kontinua reforsa nafatin ita-nia divulgasaun Lian Portugés, tanba Lian Portugés hanesan lian ofisiál, tanba ne’e hakarak ka lakohi profesór sira hotu-hotu tenke aprende Portugés ho di’ak atu nune’e bele hanorin ita-nia estudante ho loloos”, dehan S.E. Ministra Edukasaun.
Governante ne’e hatutan, iha mós eskola CAFE iha munisípiu hotu, nune’e koko nafatin hodi tau esforsu hanesan obrigasaun Ministériu Edukasaun nian hodi kontinua reforsa programa ne’e no iha futuru sei haree posibilidade ruma no meiu sira atu bele kontinua reforsa Lian Portugeza iha Timor-Leste.
Iha fatin hanesan Embaixadora Portugal iha Timor-Leste Sra. Manuela Bairos hateten, projetu Pro-Portugés importante tebes atu bele fó formasaun ba profesór sira iha Lian Portugés liuhusi transmite matéria sira atu bele kapasita no prepara liután profesór sira bainhira ba hanorin estudante sira.
“Responsabilidade iha ita-nia liman, alunu sira dalaruma di’ak liu depende mós formasaun ba profesór sira, kapasidade ne’ebé profesór sira iha, ita la’ós hanorin de’it estudante sira kona-ba matéria, maibé motiva mós sira, tanba ne’e ita hotu hanoin katak profesór sira iha ita-nia moris ne’ebé importante tebes”, dehan Embaixadora Portugal.
Aléinde ne’e Diretór Servisu Edukasaun Munisípiu Liquiça Sr. Julio Carvalho hateten, edukadór/a di’ak presiza jere ninia profisionalizmu ho di’ak liga ho kompeténsia sira hanesan, domina Lian Tetun, Portugés, Étika Profesionál, Koñesimentu Sientífiku no Pedagójika.
“Sai profesór tenke iha karreira profisionál ne’ebé la hanesan ho ema seluk, tan ne’e profesór iha papél hanorin no eduka atu hasa’e kualidade edukasaun, profesór sira tenke iha kapasitasaun ba ninia koñesimentu liuhusi formasaun no semináriu sira, dehan Diretór Servisu Edukasaun Munisípiu Liquiça.
#MédiaME
