Díli – Segunda-Feira, 29 Abríl 2024
Sua Exelénsia Ministra Edukasaun Dra. Dulce de Jesus Soares hamutuk ho Ministru Juventude, Desportu, Arte no Kultura Sr. Nelio Isaac Sarmento halo abertura ba semináriu integrasaun Tais ba Kurríkulu Eskolár 3º Siklu atu bele garante sustentabilidade iha futuru. Semináriu ne’e realiza iha Salaun Ian Martin INFORDEPE.
Iha abertura ne’e, S.E. Ministra Edukasaun Dra. Dulce de Jesus Soares hateten, Ministériu Juventude, Desportu, Arte no Kultura lori servisu ida hodi integra ho servisu Ministériu Edukasaun nian ne’ebé mak iha responsabilidade bo’ot atu fó kontinuidade liuhusi kurríkulu ba estudante sira kona-ba matéria Tais ne’e rasik hodi bele kontinua kultura ne’ebé iha.
“Ministériu Edukasaun daudaun ne’e iha prosesu halo revizaun ba kurríkulu 3º siklu, ne’e tempu di’ak tebe atu integra matéria ne’e, tanba iha mós disiplina ida naran Arte no Kultura no ba oin sei kontinua iha Ensinu Sekundáriu”
Governante ne’e hatutan, Matéria Tais ne’e la’os iha Arte no Kultura de’it, maibé iha mós testu kona-ba Lian Inglés no Lian Portugés inklui mós matéria Kímika, tanba tau mós iha matéria Tais ne’e kona-ba reasaun kímika ne’e sai hanesan baze ba produsaun Tais, tanba ne’e ema hotu iha responsabilidade atu bele prezerva no kontinua.
Iha fatin hanesan, Ministru Juventude, Desportu, Arte no Kultura Sr. Nelio Isaac Sarmento hateten, governu harii komisaun ida espesiál liu kona-ba valór Tais hodi identifika atu bele hetan rekoñesimentu ida husi mundiál hodi sai hanesan patrimóniu ba ita-nia rai.
“Ministériu hanoin katak tenke integra iha edukasaun atu bele sai hanesan matéria ida hodi jerasaun foun sira bele hatene kona-ba oinsá halo produsaun ba Tais”, dehan MJDAK.
#jornalistapauladelgado
#MédiaME
