ME PARTISIPA IHA KOMEMORASAUN LORON VETERANU BA DALA-7
Díli, 03/03/2024 - Ministra Edukasaun Dra. Dulce de Jesus Soares, partisipa iha komemorasaun loron Veteranu ba dala-7 hodi fó no omenajen ba luta libertasaun nasionál. Serimónia ne'e hala'o iha Palásiu Governu, domingu ne'e.
Iha diskursu Prezidente Repúblika nian, ne'ebé lee husi Prezidente Tribunal Rekursu Dr. Deolindo dos Santos dehan, ho onra no emosaun orgullu bo'ot mak halibur hamutuk ohin hodi selebra Loron Nasionál Veteranu iha Timor-Leste. Iha okaziaun espesiál ida-ne'e, hanoin-hetan no fó omenajen ba sira ne'ebé luta maka'as ba ita-nia nasaun doben nia independénsia no soberania, liuliu ba martir sira ne'ebé fakar sira-nia raan no fó sira-nia moris.
"Hamutuk Ita Sei Hakat Hamutuk Ba Futuru, la'os de'it hatudu ita-nia Veteranu sira-nia luta iha tempu uluk, maibé mós sira-nia inspirasaun ba jerasaun sira iha futuru. Nu'udar ita haree ba futuru Timor-Leste nian, importante tebes atu rekoñese papél fundamentál Veteranu sira-nian iha promosaun valór no prinsípiu sira ne'ebé importante tebes atu harii Estadu Direitu no konsolida direitu no liberdade sira ne'ebé ita hotu goza", dehan PTR.
Prezidente Tribunal Rekursu hatutan, presiza soldadu foun ba luta ba libertasaun iha tempu agora, hasoru ki'ak multidimensionál, malnutrisaun inan no labarik no seguransa ai-han ne'ebé afeta ema sira ne'ebé persija tebes atensaun, vulnerável no la hetan benefísiu liu, no kompromete negativamente ita-nia progresu hodi kumpre ba Objetivu Dezenvolvimentu Sustentavel (ODS).
