ME FÓ POSE BA MANORIN HAMUTUK NA’IN 248 HODI INGRESA NU’UDAR DOSENTE
Liquiça, 02/03/2024 – Ministra Edukasaun Dra. Dulce de Jesus Soares no Sekretáriu Estadu Ensinu sekundáriu no Ensinu Tékniku Vokasionál Sr. Domingos Lopes Lemos fó pose ba manorin kontratadu hamutuk na’in 248 ba ingresu espesiál hodi ingresa nu’udar dosente iha Ministériu Edukasaun. Serimónia ne’e realiza iha salaun Tokodede, Munisípiu Liquiça, Sábadu ne’e.
Iha diskursu Ministra Edukasaun Dra. Dulce de Jesus Soares hateten, edukadór/a mak sistema edukasaun nia fuan, tanba manorin sira koñese di’ak nia estudante idak-idak nia pontu forte, fraku interese no personalidade.
“Manorin na’in halo esforsu hodi tulun estudante idak-idak atu atinji ninia potensiál máximu, manorin di’ak ida sei uza nia kreatividade atu buka solusaun nomós nia fuan bo’ot atu hadomi estudante sira hotu, mesmu balun hatudu hahalok ne’ebé lagosta”, dehan Ministra Edukasaun.
Governante ne’e hatutan, manorin di’ak ida motivadu la’os tanba saláriu ka rekoñesimentu, maibé husi ninia orgullu ba bainhira nia estudante domina kompeténsia foun id aka envolve-an iha atividade aprendizajen ho haksolok.
Iha fatin hanesan Sekretáriu Estadu Ensinu sekundáriu no Ensinu Tékniku Vokasionál Sr. Domingos Lopes Lemos hateten, ohin manorin sira simu termu aseitasaun pose kareira dosente hodi sai funsionáriu permanente iha Ministériu Edukasaun hodi serví de’it timoroan sira iha área edukasaun hodi kontribui ba dezenvolvimentu iha futuru.
“ohin imi jura ona iha ne’e ba maromak no nasaun, tanba ne’e hala’o servisu ho did’ak nu’udar manorin na’in, tenki iha étika hodi hanorin ita-nia oan sira ho di’ak liután”, dehan Sekretáriu Estadu.
Entretantu atividade serimónia tomada de posse ne’e hetan prezensa husi Komisaun G ba Asuntu Edukasaun Parlamentu Nasionál Distintu Deputadu Firmino Taequi, Prezidente Autoridade Munisípiu Liquiça Sr. Paulino Ribeiro ho nia estrutura, Reprezentante Komisaun Funsaun Públika, Prezidente INFORDEPE Sr. Domingos Martins nomós dirijente sira Ministériu Edukasaun nian.
