Díli – Loron, Tersa-feira, 20 Agustu 2024
Sua Exelénsia Ministra Edukasaun Dra. Dulce de Jesus Soares, partisipa iha komemorasaun loron FALINTIL ba dala-49 ho tema “Selebra loron 20 fulan agustu mak komemora FALINTIL nia luta, ne’ebé la’os diferente, maibé únika. Ne’e mak tempu reflesaun no tempu ba mudansa!”, iha Kuartel Jenerál Fatuhada, Dili.
Iha diskursu, Sua Exelénsia Prezidente Repúblika Dr. José Ramos-Horta, hateten, ohin selebra aniversáriu ba dala-49 kriasaun Forsa Armada ba Libertasaun Nasionál Timor-Leste (FALINTIL). Momentu ida-ne’e hanesan oportunidade ida atu fó onra no hanoin hikas tinan ruanulu-resin- haat luta ba libertasaun nasionál no tinan ruanulu-resin-lima harii dame, dezenvolvimentu nasionál no hametin Estadu Direitu Demokrátiku.
“FALINTIL, ne’ebé ohin komemora tinan ba dala-49, moris nafatin iha timoroan tomak nia fuan no memória. Ita rekoñese militár nia papél krusiál hodi harii Timor-Leste ida ne’ebé seguru, modernu no prósperu. Mai ita halibur ita-nia esforsu sira iha luta hasoru ki’ak, hamlaha no inseguransa ai-han no la’o ba oin ho determinasaun no esperansa”, dehan Xefe Estadu.
Xefe Estadu ne’e hatutan, labele haluha papél esensiál amu-lulik, madre no relijioza konsagrada sira hotu nian ne’ebé, iha tinan barak nia laran, la’os de’it oferese refújiu no protesaun ba FALINTIL, maibé liuliu, sai nu’udar fonte fiar no inspirasaun konstante ba hotu-hotu. Igreja Katólika la’os de’it akompaña ita- nia luta, Igreja Katólika iha sentru luta, nu'udar forsa morál no espirituál ne'ebé orienta ita ho tuba rai metin ba independénsia.
Iha loron komemorasaun FALINTIL ne’e, iha mós atividade feira ne'ebé realiza husi estudante husi eskola Ensinu Sekundáriu Jerál 4 Setembru UNAMET Dili, ESTV GTI Becora, EB no ESG CAFE Taibesi, EBC 30 de Agosto no EBF 5 Comoro.
#MédiaME
