Díli – loron, sexta-feira, 23 agustu 2024
Sua Exelénsia Ministra Edukasaun Dra. Dulce de Jesus Soares, partisipa iha faze finál ba sertame nasionál ne’ebé kompete husi eskola Ensinu Sekundáriu Jerál Públiku Lere-Anan Timur, Lautem, Ensinu Sekundáriu Jerál Públiku Halibur Betano, Manufahi no Ensinu Sekundáriu Jerál Públiku Nú. 1 Liquiça, hodi komemora loron konsulta populár 30 agustu ba dala-25, iha Salaun Ian Martin INFORDEPE, Díli.
Iha diskursu, Sua Exelénsia Ministra Edukasaun Dra. Dulce de Jesus Soares, hateten, iha oportunidade ida ne’e, enkoraja estudante no profesór sira hotu atu prepara estudante sira, nune’e, bele tuir kompetisaun hanesan ne’e hodi hasa’e liután estudante sira-nia koñesimentu no mentalidade ba futuru ne’ebé di’ak liu.
“Kompetisaun ida ne’e hanesan dalan ida mós atu kontinua reforsa ita-nia prosesu aprendizajen no mós oinsá mak enkoraja estudante sira atu estuda no ba profesór sira mós bele haka’as-an liután hodi hanorin estudante sira”, dehan Ministra Edukasaun.
Governante ne’e hatutan, rezultadu husi sertame ne’e, mesmu oituan, maibé Gabinete Peskiza bele foti dadus hodi halo peskiza, atu bele hatene kona-ba estudante sira-nia aprezentasaun durante ne’e, matéria saida mak di’ak no matéria saida mak ladi’ak, nune’e iha formasaun tuir mai bele konsentra mós ba informasaun sira ne’ebé hetan husi sertame.
Iha finál sertame ne’e, eskola Ensinu Sekundáriu Jerál Públiku Lere-Anan Timur, Lautem ho valór 2300 (1 Lugar), Ensinu Sekundáriu Jerál Públiku Nú. 1 Liquiça ho valór 1500 (2 Lugar) no Ensinu Sekundáriu Jerál Públiku Halibur Betano, Manufahi ho valór 1000 (3 Lugar).
#MédiaME
