Díli – loron, Sexta-feira, 23 agustu 2024
Sua Exelénsia Ministra Edukasaun Dra, Dulce de Jesus Soares no Sua Exelénsia Ministra Saúde Dra. Elia dos Reis Amaral, asina memorandu nota entendimentu kona-ba programa importante haat (4) hanesan, Saúde Eskolár, Edukasaun Inkluzivu, Saúde Orál no Nutrisaun, hanesan marka signifikativu ida-ne'ebé subliña kompromisu konjunta ba moris-di'ak no dezenvolvimentu integradu ba labarik no joven sira. Nota entendimentu ne’e asina iha Salaun Ministériu Saúde Kaikoli, Díli.
Iha Diskursu, Sua Exelénsia Ministra Edukasaun Dra, Dulce de Jesus Soares, hateten, kontenti tebes, tanba ekipa rua ne’e konsege servisu hamutuk hodi bele realiza asinatura note entendimentu ida ne’e, tanba ho objetivu atu lori programa saúde eskolár ne’e ba eskola sira.
“Responsabilidade programa saúde eskolár inklui saúde orál no nutrisaun sai nu’udar responsabilidade Ministériu Edukasaun no Ministériu Saúde hodi foka ba saúde eskolár kontinua servisu tuir padraun no polítika ne’ebé operasionaliza husi Ministériu Saúde”, dehan Ministra Edukasaun.
Iha fatin hanesan, Sua Exelénsia Ministra Saúde Dra. Elia dos Reis Amaral, hateten, saúde eskolár nu'udar pilár esensiál ida iha formasaun ba jerasaun sira iha futuru, labarik no adolexente sira-nia moris-di'ak ba fíziku, kognetivu no psikolójiku la'os de'it forma sira-nia viajen pesoál, maibé mós reflete diretamente kona-ba dezenvolvimentu iha sosiedade.
“Ohin loron, ita selebra kolaborasaun ne'ebé sei hametin no habelar ita-nia abilidade atu promove saúde eskola ne'ebé forte no integradu, ambiente eskola ne'ebé promove saúde mentál no emosionál, oferese apoiu psikolójiku no jere estrese no laran-susar bele hasa'e kapasidade intelektuál ba ita-nia joven sira. Integrasaun estratéjia saúde mentál iha eskola sira permite estudante sira atu hasoru dezafiu akadémiku no pesoál ho reziliénsia no konfiánsa boot-liu.
#MédiaME
