Díli – loron segunda-feira, 26 agostu 2024
Sua Exelénsia Ministra Edukasaun Dra. Dulce de Jesus Soares konvida autór no autora sira ne’ebé partisipa direta iha akontesimentu loron 30 fulan agostu tinan 1999, hodi ezerse sira-nia votu ba autodeterminasaun, atu bele konta istória pasadu nian ba estudante sira, nune’e bele hametin liután sentidu patriotizmu no nasionalizmu hodi buka aprende no estuda atu lori nasaun ne’e ba oin.
Iha intervensaun, Sua Exelénsia Ministra Edukasaun Dra. Dulce de Jesus Soares, hateten, istória ne’ebé ohin haktuir, folin bo’ot tebe-tebes hanesan lisaun ida no sai mós hanesan matadalan ba jerasaun foun sira atu bele kuda metin liután espíritu patriotizmu, nasionalizmu, étika no morál atu bele sai ema ne’ebé iha responsabilidade ba rai ne’e.
“Estudante sira, imi mak futuru nasaun nian, tanba ne’e aprende ho di’ak iha rai ne’e, rai ne’ebé ema barak mak lori ruin, ran, terus no sofrementu oin-oin hodi sosa ukun-an , tanba ne’e uza oportunidade ida ne’e ho di’ak atu bele dezenvolve nasaun ida ne’e ba futuru ho di’ak liután”, dehan S.E. Ministra Edukasaun.
Atividade refere hetan partisipa másimu husi Eskola Sekundáriu Jerál 4 Setembru UNAMET Dili, iha parte dader nian no iha parte lokraik hetan partisipa husi Eskola Sekundáriu Jerál 12 de Novembro, Becora, Eskola Sekundária TéknikaVokasionál 28 de Novembro, Becora no Eskola Grupu Teknolojia no Industria (GTI), Becora.
#MédiaME
