ME HO PR DISKUTI KONA-BA DESIMINASAUN DOKUMENTU FRATERNIDADE UMANA

Díli, 09/02/2024 – Ministra Edukasun Dra. Dulce de Jesus Soares hala’o enkontru ho Prezidente Repúblika Dr. José Ramos Horta hodi diskuti kona-bá prosesu atu hahú desimina dokumentu fraternidade umana ne’ebé mak hetan ona rezolusaun husi Parlamentu Nasionál. Enkontru ne’e hala’o iha Palásiu Prezidente, Aitarak-Laran, Sexta-feira ne’e.

Iha entrevista Ministra Edukasaun Dra. Dulce de Jesus Soares hateten, Ministériu Edukasaun simu responsabilidade tomak atu garante katak dokumentu fraternidade umana ne’ebé mak asina ona husi Amu Papa atu bele hatama iha kuríkulu ne’ebé mak oras ne’e iha hela faze revizaun nomós sei hatama ba iha matéria formasaun profesór no profesora nian.

“Ministériu iha faze revizaun ba kuríkulu, signifika katak iha tinan ida ne’e nia laran hahú hatama iha kuríkulu, tanba ne’e Ministériu Edukasaun sei servisu hamutuk ho Gabinete Prezidénsia atu garante katak iha dokumentu ne’ebé simples, nune’e manorin no estudante sira bele uza”, dehan Ministra Edukasaun.

Governante ne’e hatutan, dokumentu fraternidade ne’e iha vantajen ba estudante, profesór no profesora sira, tanba ne’e mak Parlamentu Nasionál halo rezolusaun ida no hotu-hotu konkorda adopta dokumentu ida ne’e iha nasaun Timor-Leste.