ME HALO KOMUNIKADU IMPRENSA KONA-BA REZULTADU APLIKASAUN BOLSA KANDIDATU BA MANORIN
Díli, 12/02/2024 – Ministériu Edukasaun realiza Komunikadu Imprensa kona-bá prosesu konkursu bolsa kandidatu profesór no profesora nian ne’ebé hahú loke inskrisaun iha loron 29 janeiru to’o loron 9 fevreiru tinan 2024 iha teritóriu laran tomak. Konferénsia Imprensa ne’e realiza iha salaun konferénsia Ministériu Edukasaun, Vila-Verde, segunda-feira ne’e.
Iha konferénsia Imprensa ne’e Porta-Voz Gabinete Ministra Edukasaun Sr. Filipe Rodrigues Pereira hateten, Ministériu Edukasaun hamutuk ho Komisaun Funsaun Públika ho NGO BELUN ajuda Ministériu halo prosesu ne’e iha Munisípiu 12 inklui RAEOA.
“Iha prosesu inskrisaun ne’e, aplikante ne’ebé mak lori sira nia dokumentu mai aplika iha konkursu ne’e ho totál 8601 feto 4916 no mane 3685, husi rezultadu impresionante katak feto iha antuziasmu bo’ot liu duké mane hodi aplika nu’udar manorin”, dehan Porta-Voz ME.
Enkuantu submisaun aplikasaun iha Munisípiu Díli okupa 36,52% husi totál aplikante hotu-hotu, Munisípu Ermera 11,21%, Baucau 8,72%, Bobonaro 7,88%, Manufahi 5,69%, Viqueque 4,78%, Covalima 4,60%, Ainaro 4,20%, Aileu 3, 69%, Liquiça 3,58%, Lautem 3,51%, Manatuto 2,86% no RAEOA 2,76%.
