Díli – loron tersa-feira, 17 setembru 2024
Sua Exelénsia Ministra Edukasuan Dra. Dulce de Jesus Soares hamutuk ho Sua Exelénsia Prezidente Repúblika Dr. José Ramos-Horta, akompaña ativista feto ida ba asuntu klimátika husi Nasaun India ho naran Licypriya Kanguajam, tinan 12, hala’o vizita ba eskola CAFE Taibessi hodi fahe esperiénsia kona-ba mudansa klimátika ba estudante sira.
Iha entrevista, Sua Exelénsia Ministra Edukasaun Dra. Dulce de Jesus Soares, hateten, importante husi vizita ativista ba asuntu klimátika ne’e hodi fahe esperiénsia ne’ebé nia hetan durate iha nia moris kona-ba saida mak bele halo, bainhira hasoru problema ruma kona-ba asuntu klimátika.
“Husi vizita ida ne’e, ita-nia profesór no estudante sira bele foti husi nia mensajen ne’e hodi prátika liuhusi parte ki’ikoan sira mak ohin nia hateten kona-ba kuda ai, labele soe lixu arbiru, soe lixu iha nia fatin no seluk tán, ne’ebé hanesan prátika ki’ikoan mak ita bele halo”, dehan S.E. Ministra Edukasaun.
Governante ne’e hatutan, Ministériu Edukasaun servisu hamutuk ho PERMATIL hodi tau ona matéria meiu ambiente ne’e iha kurríkulu no iha eskola hotu-hotu iha tiha ona disiplina kona-ba mudansa klimátika hahú husi nivel pré-eskolar to’o nivel sekundáriu, tanba ne’e husu ba manorin no inan-aman sira kontinua servisu hamutuk, nune’e bele tau iha prátika.
Iha fatin hanesan Ativista ba Asuntu Klimátika, Licypriya Kanguajam, hateten, hanesan ativista ba asuntu klimátika, hakarak tulun mós Timor_Leste , liuliu labarik sira, estudante no komunidade tomak atu bele loke matan ba asuntu klimátika iha nasaun ne’e rasik no koko buka solusaun hodi hapara tiha problema meiu ambiente nian hanesan poluisaun, dezastre naturál, soe lixu arbiru no seluk tán.
“Ha’u nia foku liu mak inisiativa voluntáriu iha Timor-Leste hodi tulun timoroan sira atu hapara problema ida ne’e no sai ativu liu iha ita-nia komunidade no alerta atu hamoos kampu oinoin halo plantasaun, kuda ai-horis no seluk tán”,dehan Ativista ne’e.
#MédiaME
