Manatutu – loron segunda-feira, 16 setembru 2024
Sua Exelénsia Ministra Edukasaun Dra. Dulce de Jesus Soares hamutuk ho Embaixadora Boavontade ba Asuntu Edukasaun, Dra. Kirsty Sword Gusmão no parseiru sira husi Singapura hala’o vizita ba Eskola Ensinu Báziku Filiál (EBF) Rembor, Manatutu, hodi haree no observa direta prosesu aprendizajen iha sala laran liuhusi programa EMULI, iha EBF Rembor Manatutu.
Iha enkontru, Sua Exelénsia Ministra Edukasaun Dra. Dulce de Jesus Soares, hateten, metodolojia hanorin labarik sira iha lian inan ne’e atu halo sira avontade hodi husu no hatan ba matéria ne’ebé mak sira aprende iha sala laran no ohin observa katak manorin sira husu kona-ba matéria ne’ebé aprende, estudante sira mós hatan ho vontade tomak.
“Inan-aman sira tenki kontenti ho profesór no profesora sira, tanba sira hanorin ho di’ak tebe-tebes, tanba bele hanorin ida nia oan sira aprende no kompriende buat ruma, nune’e husu ba inan aman sira atu apoiu nafatin manorin sira hodi bele hamutuk dezenvolve labarik sira ba futuru liuhusi prosesu aprendizajen, dehan S.E. Ministra Edukasaun.
Iha fatin hanesan Sua Exelénsia Embaixadora Boavontade ba Asuntu Edukasaun, Dra. Kirsty Sword Gusmão, hateten, sente orgullu tebe-tebes, tanba EBF Rembor, tanba hanesan eskola ida ne’ebé dahuluk implementa programa EMULI bazeia ba lian inan.
“Senti kontenti tebes, haree jestaun sala aula ne’ebé furak tebes no organiza kantinu tuir matéria iha, labarik sira mós organiza grupu ki’ik hodi aumenta sira-nia preparasaun no komunikasaun di’ak ba malu mak importante tebes, la’os tanba infraestrutura mak di’ak liu, maibé importante mak manorin sira-nia matenek no kreatividade hodi ajuda labarik sira aprende ho ativu, iha hanoin krítivu no kreativu”, dehan S.E. Embaixadora Boavontade.
Embaixadora ne’e hatutan, metodolojia hanorin uza lian inan bazeia ba evidensia no peskiza ne’ebé mak matenek na’in sira halo hodi hatudu katak, bainhira labarik sira tama iha sala laran no manorin hanorin ho lian ne’ebé labarik sira lakomprende mak sira labele aprende buat ida, maibé bainhira hanorin sira literasia ho lian inan mak fasil lia atu apren lian tetun no portugés.
Avaliasaun ba programa EMULI iha tinan 2016 hatudu duni, katak labarik sira 20 anu, sira-nia portugés di’ak liu kompara ho sira iha eskola CAFE, tanba sira iha fundasaun metin ho sira-nia lian inan, nune’e programa EMULI ne’e hanesan prátika di’ak ne’ebé hakarak aplika iha ne’e.
#MédiaME
