Aileu, Segunda-Feira, 08 abríl 2024
S.E. Ministra Edukasaun Dra. Dulce de Jesus Soares ho S.E. Ministra Saúde Dra. Élia dos Reis Amaral halo sosializasaun no lansamentu polítika programa intergradu Saúde no dokumentu sira polítika Saúde nian iha salaun Timor Kmanek Aileu.
Iha oportunidade ida ne’e, S.E. Ministra Edukasaun Dra. Dulce de Jesus Soares iha nia diskursu hateten, Ministériu Edukasaun la’os de’it haree ba profesór ka infraestrutura, maibé tenke haree mós ba Saúde estudante sira nian.
“Ha’u louva tebe-tebes ba Ministériu Saúde ne’ebé mak foin dahuluk halo buat barak no liuhusi dokumentu ida ne’e fó importánsia boot tebe-tebes ba Saúde Eskolár”, bodik S.E. Ministra Edukasaun.
Hafoin serimónia remata S.E. Ministra Saúde Dra. Élia dos Reis Amaral informa ba jornalista sira, ohin konvida mós Ministériu Edukasaun, tanba foka mós ba programa Saúde Eskolár husi alunu sira nian, hodi nune’e bele haree ba merenda eskolár no oinsá atu haree ba prevensaun kaben sedu ba estudante sira iha idade joven nian.
Enkuantu serimónia sosializasaun no lansamentu polítika programa intergradu Saúde no dokumentu sira polítika Saúde nian hola parte mós husi S.E. Ministra Edukasaun Dra. Dulce de Jesus Soares, S.E. Ministra Saúde Dra. Élia dos Reis Amaral, S.E. Vise-Ministru ba Fortalesimentu Instituisionál Saúde Sr. José dos Reis Magno no S.E. Vise-Ministru ba Operasionalizasaun Ospital Sr. Flávio de Araújo no Diretora Jerál Planu Polítika Inkluzaun no Informátika Sra. Odilia das Dores Ung Martins, Dirijente Ministériu Saúde no Ministériu Edukasaun nian nomós Diretór Saúde Munisípiu 12, inkliu RAEOA.
#MédiaME
