Díli, sexta-feira, 05 abríl 2024
Sua Exelénsia Ministra Edukasaun Dra. Dulce de Jesus Soares hala’o enkontru kortezia ho Co-founder & Board husi Fundasaun EMGdotART Sr. Victor Lei ho ekipa hodi fahe esperiénsia ligadu ho kultura edukasaun nomós oinsá atu promove no dezenvolve projetu edukativu kulturál Timor-Leste nian. Enkontru ne’e hala’o iha sala VIP Ministériu Edukasaun, Vila-Verde.
Iha enkontru ne’e S.E. Ministra Edukasaun Dra. Dulce de Jesus Soares hateten, enkontru ohin ho EMGdotART husi Xina atu ba oin iha pontensiál atu ba futuru bele halo kooperasaun ruma iha área formasaun ba manorin, área teknolojia, tanba sira nia funsaun ne’e foka liubá asuntu multimedia.
“Inklui mós oinsá mak atu bele iha ideia ruma, tanba sira mós mai husi pasadu ne’ebé iha arte marsiais no ita haree katak dadauk ne’e joven barak mak involve iha atividade ida ne’e, la’os buat at hotu de’it, maibé oinsá mak bele tranforma ba atividade ida ne’ebé mak pozitivu hodi kontribui ba dezenvolvimentu rai ne’e nian”, dehan S.E. Ministra Edukasaun.
#jornalistapauladelgado
#MédiaME
