Díli – loron kinta-feira, 19 setembru 2024
Sua Exelénsia Ministra Edukasaun Dra. Dulce de Jesus Soares hamutuk ho ativista timoroan sira, simu ahu-kadesan kompañeira luta Timor-Leste nian Dra. Helen Mary Hell, husi Australia, iha Aeroportu Internasional Nicolau Lobato Comoro, Díli.
Iha entrevista Sua Exelénsia Ministra Edukasuan Dra. Dulce de Jesus Soares, hateten, Dra. Helen Mary Hell servisu tinan barak iha Ministériu Edukasaun liuliu iha área dezenvolvimentu kurríkulu ba ensinu sekundáriu jerál no tékniku vokasionál no hanesan mós asesora ida ne’ebé fó nia hanoin barak ba Ministériu Edukasaun liuliu oinsá mak atu dezenvolve eduakasaun ida ne’ebé mak responde ba situasaun global agora nian.
“Dra. Helen Mary Hell, ema ida ne’ebé matenek tebes iha área edukasaun no iha paixaun bo’ot tebes ba edukasaun, la’os de’it iha tempu formál, maibé iha ne’ebé de’it nia iha sempre ko’alia kona-ba edukasaun”, dehan Ministra Edukasaun.
Iha fatin hanesan, kolega husi Matebian, Sr. Ismenio Martins da Silva, hateten, ahu kadesan husi Dra. Helen mary Hell ninian, tuir família bo’ot timoroan tomak ne’ebé konsidera nia hanesan família rasik, tanba nia mai kedas iha tinan 1975 to’o nia moras hafoin lori ba Australia hodi hakotu iis.
“Belun solidariedade internasionál no timoroan sira hodi realiza fatin ida própriu ne’ebé mak hetan mós apoiu husi governu Timor-Leste liuhusi Munisípiu Díli fó aprovasaun hodi harii monumentu ida ba Dra. Helen Hell iha rate Santa-Kruz”, dehan Sr. Ismenio Martins da Silva.
Dra. Helen Mary Helll mai iha Timor-Leste iha Tinan 1975, hanesan feto ida ne’ebé hakarak kontribui ba luta libertasaun nasionál no matebian fó nia kontribuisaun bo’ot tebes ho domin ba nasaun Timor-Leste hahú kedas iha luta ba libertasaun nasionál to’o luta ba edukasaun no justisa sosiál.
#MédiaME
