ME HALO ENKONTRU REGULÁR HO VISE-PM HODI FÓ INFORMASAUN KONA-BA SERVISU MINISTÉRIU EDUKASAUN NIAN
Díli, 20/02/2024 – Ministra Edukasaun Dra. Dulce de Jesus Soares akompaña husi Diretora Jerál Planu Polítika Inkluzaun no Informátika Sra. Odilia das Dores Martins no Diretora Jerál Administrasaun no Finansas Sra. Cecília de Assis hala’o enkontru regulár ho Vise-Primeiru Ministru, Ministru Koordenadór Asuntu Sosiais no Ministru Denvolvimentu Rurál no Habilitasaun Komunitária Eng. Mariano ASSANAMI Sabino hodi fó informasaun kona-ba servisu ne’ebé mak Ministériu Edukasaun halo iha fulan janeiru to’o fevreiru, iha Gabinete Vise-PM, Palásiu Governu.
Iha entrevista Ministra Edukasaun Dra. Dulce de Jesus Soares hateten, servisu ne’ebé halo mak kontinua halo monitorizasaun ba prosesu aprendizajen iha eskola sira nomós kontinua programa formasaun profesór/a liu-liu iha Língua Portugueza liuhusi programa Pro-Portugues ne’ebé halo kooperasaun ho governu Portugues.
“Iha enkontru ohin fó mós informasaun kona-ba apoiu ne’ebé Ministériu Edukasaun hetan husi doadór sira nomós servisu ida kona-ba programa prontidaun eskola nomós programa seluk tán ne’ebé hala’o iha fulan janeiru no fevreiru.
Governante ne’e mós hatutan, difikuldade ne’ebé iha mak sala aula nafatin problema, maibé komitmentu governu nian tau nafatin orsamentu hodi hala’o nafatin programa sira ne’e, tanba ne’e servisu hamutuk nafatin ho ministériu sira seluk no komunidade edukativa tomak atu garante katak vizaun bo’ot ida Timor-Leste nian mak timoroan sira bele asesu ba edukasaun ho kualidade.
