SEKRETÁRIU ESTADU ESJESTV HALO AUDIÉNSIA HO ILO DISKUTE FORMASAUN BA ESKOLA TEKNÍKA VOKASIONÁL SIRA.

Dili, 13/02/2024- Sekretáriu Estadu Ensinu Sekundáriu Jerál no Ensinu Sekúndária Tékniku Vokasionál Sr. Domingos Lopes Lemos akompaña husi Diretor Jerál Ensinu Sekundáriu Jerál no Tékniku Vokasionál Diretor Nasional Tékniku Vokasional hala'o audiénsia ho reprezentante Internationál Labour Organization (ILO) Sr. Tendy Gunawan ho ekipa hodi diskute kona-ba formasaun ba eskola tekníka vokasionál iha Timor Leste, iha sala VIP, Ministériu Edukasaun Vila-Verde Tersa-feira ne'e

Hafoin audiénsia, Exelénsia Sekretáriu Estadu Ensinu Sekundáriu Jerál no ensinu tekníku vokasionál Sr. Domingos Lopes Lemos, ba Jornalista sira hateten, ohin enkontru ho ILO iha Timor Leste hodi Ko'alia kona-ba formasaun ba profesore/a no eskola ne’ebé prioridade ba eskola tekníku vokasionál.

"ohin ekipa Diresaun Jerál Ensinu Sekundáriu Tekníku Vokasionál ho Diresaun Nasionál hodi ko'alia ho sira atu nune'e formasaun ne’e bele ba profesór ka eskola sira ne’ebé iha area tekníku vokasionál", Dehan Exelénsia ne'e.

Governante ne’e akresenta, tuir idenfikasaun husi ILO nian sei fo formasaun ba eskola tekníka vokasionál agrikola haat ne’ebé foin dadauk Ministériu Agrikultura halo transferénsia ba Ministériu Edukasaun maibé Ministériu mos sei identifika eskola tekníka vokasionál sira seluk ne’ebé departamentu hola parte mos iha agrikultura.

Iha fatin hanesan reprezentante ILO Sr. Tendy Gunawan dehan, enkontru ohin neé atu halo aprezentasaun ba Exélensia Sekretariu Estadu kona-ba projetu ILO nian ne'ebé hetan apoiu husi Uniaun Europeia kona-ba setor agro-Floresta nian.

"Atu identifika no oinsá hametin kolaborasaun ka servisu hamutuk ho Ministériu Edukasaun nian liuliu atu hasa'e koñesimentu ka kapasitasaun estudante no profesor/a sira", tenik reprezentante ILO.