ME HALO ABERTURA FORMASAUN BA INSPETÓR PRÉ-ESKOLÁR
Díli, Tersa-feira, 05/03/2024
S.E. Ministra Edukasaun Dra. Dulce de Jesus Soares akompaña husi Embaixadora Nova Zelándia iha Timor-Leste, Sra. Helen Tunnah halo abertura formasaun ba Inspetór Pré-Eskolár hodi hasa’e liután sira-nia koñesimentu kona-ba dezenvolvimentu labarik sira nian. Formasaun ne’e realiza iha Salaun Ian Martin, INFORDEPE, tersa-feira ne’e.
Iha abertura ba formasaun ne’e, S.E. Ministra Edukasaun Dra. Dulce de Jesus Soares hateten, Inspetór Pré-Eskolár mai husi prosesu ida ne’ebé kompriensivu tebe-tebes, liuhusi prosesu selesaun hafoin ba rekrutamentu.
“Inspetór tenki tau nia-an iha fatin, tanba tuir regra inspesaun ne’e tenki iha ema ne’ebé profesionál, nia labele hali’is ba mai, atu nune’e nia servisu ne’e bele la’o ho loloos no públiku mós haree katak sai inspetór ida hatene koloka nia-an ho di’ak”, dehan S.E. Ministra Edukasaun.
Governante ne’e, husu inspetór sira nia seriedade atu halo servisu ho di’ak hodi halo mudansa iha ensinu pré-eskolár sira liu-liu kona-ba fatin halimar sira atu labarik sira bele halimar ho di’ak liután no asesu ba plataforma online sira atu bele ajuda manorin sira hodi hanorin ho di’ak liután.
Enkuantu formasaun ne'e apoiu husi HANDS no benefesia husi Governu Nova Zelándia, formandu sira ne’ebé partisipa iha formasaun ne’e hamutuk na’in 27 husi munisípiu 12 inklui RAEOA, formasaun ne’e durante loron rua hahú husi loron, 05 to’o 06 fulan marsu.
