ME HALO VIZITA KORTEZIA BA ESKOLA EBC RAIFUN

Maliana, Loron, Kuarta-Feira, 06/03/2024

S. E. Ministra Edukasaun Dra. Dulce de Jesus Soares hala’o vizita kortezia ba Eskola Ensinu Báziku Sentrál (EBC) Raifun hodi halo observasaun direta kondisaun eskola nomós dezenvolvimentu estudante idak-idak nian liuhusi matéria ne’ebé aprende husi manorin sira durante ne’e, iha EBC Raifun.

Iha vizita ne’e S.E. Ministra Edukasaun Dra. Dulce de Jesus Soares husu ba manorin no dirijente sira hotu iha Eskola Ensinu Báziku (EBC) Raifun atu bele distribui livru ba estudante no autoriza sira lori ba uma, nune’e bele aprende mós iha uma hodi bele hasa’e liután sira nia koñesimentu iha lee.

“Husu ita bo’ot sira atu bele fó livru ba estudante sira hodi lori ba sira nia uma, atu nune’e sira bele lee mós iha uma, atu ita bo’ot sira mós ladún gasta tempu hodi hakerek iha kuadru, maibé pelumenus halo esplikasaun ida ba sira atu sira bele kompriende kona-ba matéria ne’e”, dehan S.E. Ministra Edukasaun.

Governante ne’e hatutan, antes fó livru ba estudante sira, bele konvida inan-aman hodi partisipa hotu, nune’e sira mós ajuda hanorin oan sira iha uma nomós tau regra ida atu bele kuidadu nafatin livru ne’e atu ema hotu-hotu bele uza.