Díli – Loron, Kinta-Feira, 09 Maiu 2024
Sua Exelénsia Ministra Edukasaun Dra. Dulce de Jesus Soares halo abertura ba konferénsia nasionál kona-ba programa ligasaun ho respeitu liga ho violénsia bazeia ba jéneru ne’ebé ohin loron sai problema bo’ot iha sosiedade nia laran no sai mós problema iha eskola sira. Konferénsia ne’e realiza iha Salaun Delta Nova Díli.
Iha diskursu Sua Exelénsia Ministra Edukasaun Dra. Dulce de Jesus Soares, hateten, hakarak fó énfaze kona-ba saida mak halo programa Ligasaun ho Respeitu sai espesiál nomós efetivu. Ne’e mak ninia abordajen ba violénsia bazeia ba jéneru ne’ebé olístiku, programa ne’e rekoñese katak violénsia bazeia ba jéneru mak problema sosiedade nian, nune’e tenke rezolve mós liuhosi parte oioin husi sosiedade.
“Eskola mak fatin ida ne’ebé tenke dezenvolve estudante sira-nia kompeténsia oioin, inklui akadémiku ka kognitivu, fíziku no sosiu-emosionál. Ne’e katak estudante la bá eskola atu aprende matemátika, lian portugés ka siénsia de’it, maibé mós bá eskola atu haki’ak ninia abilidade atu sai sidadaun di’ak, ne’ebé respeita ema hotu no kontribui ba nasaun nia dezenvolvimentu no estabilidade”, dehan Ministra Edukasaun.
Governante ne’e hatutan, Kurríkulu Nasionál Baze ba Siklu 1 no 2 halo revizaun hodi toma konta prinsípiu ida-ne’e. Ekipa ne’ebé elabora livru no planu lisaun sira fó kuidadu tebes atu dezeña imajen no ezemplu sira-ne’ebé hosi mane no feto hotu. Oras ne’e sei revee hela kurríkulu ba siklu datoluk hosi Ensinu Báziku no sei kontinua asegura ekilíbriu jéneru iha imajen no ezemplu sira, no mós kontinua estuda kona-ba dezigualdade iha sosiedade.
#MédiaME
