Díli – Loron, Kinta-Feira, 09 Maiu 2024
Sua Exelénsia Ministra Edukasaun Dra. Dulce de Jesus Soares hala’o enkontru kortezia ho Sua Exelénsia Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate-Laek hodi fahe esperiénsia no enkonraza Ministériu Edukasaun hodi bele servisu di’ak liután atu bele hasa’e kualidade edukasaun iha Timor-Leste. Enkontru ne’e hala’o iha Sala Konferénsia Ministériu Edukasaun, Vila-Verde.
Iha entrevista, Sua Exelénsia Ministra Edukasaun Dra. Dulce de Jesus Soares, hateten, Ministériu Edukasaun onra tebe-tebes bele simu S.E Xefi Estadu Maiór mai vizita Ministériu Edukasaun, ne’e primeira vizita ne’ebé mak fahe esperiénsia, observa mós traballu Ministériu Edukasaun nian nomós enkoraja atu ba oin Ministériu Edukasaun bele servisu di’ak liután.
“Ministériu Edukasaun mak institusaun ida ne’ebé iha responsabilidade tomak atu garante katak povu Timór nia oan hotu-hotu ne’ebé mak atende eskola iha nasaun ida ne’e bele hetan edukasaun ida ne’ebé mak kualidade, nune’e bele sai povu ida ne’ebé mak bele kontribui di’ak liu ba dezenvolvimentu iha Timor-Leste”, dehan Ministra Edukasaun.y
Governante ne’e hatutan, iha mós diskusaun kona-ba oinsá mak husi parte Forsa Defeza nian bele ajuda traballu Ministériu Edukasaun liuliu enfrenta situasaun ne’ebé mak eskola barak estraga iha momentu hetan dezastre naturais.
Iha fatin hanesan, Sua Exelénsia Xefe Estadu Maiór Jenerál F-FDTL, Falur Rate-Laek, hateten, objetivu husi vizita ne’e hanesan vizita informál ida atu haree liu de’it, maibé hakarak mós atu rona Ministra nia hanoin kona-ba Edukasaun.
“Ami mós koordena ideia ruma para ba futuru ami-nia enjenaria sira apoiu iha ambitu SIMIK Koperasaun Sivíl Militár hanesan hadi’a eskola, ami halo segmentu ba ida ne’e de’it, hanesan ha’u nia prezensa iha ne’e, autoridade morál, legál ne’e importante, ne’e hanesan estimúlu enkorajamentu ida ka rekoñesimentu”, dehan Tenente Jenerál.
Tenente Jenerál hatutan, konstrusaun ne’e, ita esperiensia halo barak ona, iha Governu ida tinan liubá, sira fó ami halo eskola kuaze 20 resin nível nasionál, eskola bo’ot sira husi Rai-Ulun to’o Rai-Ketan, ami halo nafatin, ne’e iha ámbitu SIMIK, ne’e kuaze agora mundu tomak Militár sira uza ida ne’e, iha nível CPLP nomós nível ASEAN.
#MédiaME
