Díli – Loron, Sexta-Feira, 10 Maiu 2024
Sua Exelénsia Ministra Edukasaun Dra. Dulce de Jesus Soares hamutuk ho Sua Exelénsia Primeiru Ministru Kay Rala Xanana Gusmão partisipa iha konsulta públika kona-ba elaborasaun planu estratéjiku ba setór finanseiru iha Timor-Leste, 2025-2035 hamutuk ho Banco Central, iha Auditóriu Ministériu Finansas, Ai-Tarak laran Díli.
Iha diskursu, Sua Exelénsia Primeiru Ministru Kay Rala Xanana Gusmão hateten, tenke buka haree nafatin oinsá mak bele kontribui nafatin ho hanoin atu bele avansa no dudu ekónomia iha rai laran.
“Iha programa IX Governu konstitusionál nian sei tau matan ba planu dezenvolvimentu hodi kria kondisaun ba mikro empreza, pekena empreza sira no médiu empreza atu bele dezenvolve ekónomia iha rai-laran”, dehan PM.
Iha diskursu, Governadór Banco Central, Sr. Helder Lopes hateten, ohin halibur hamutuk iha ne’e hodi halo avaliasaun ba implementasaun planu mestre ba dezenvolvimentu setór finanseiru no importante liu mak atu kontribui hanoin hamutuk ba elaborasaun planu Estratéjiku dezenvolvimentu setór finanseiru ba tinan 2025 to’o 2035.
“Banku Sentrál Timor-Leste nu’udar instituisaun públika ne’ebé hala’o nia knaar ho independente hodi suporta dezenvolvimentu sósiu ekonómiku iha Timor-Leste, tanba ne’e ohin mai hamutuk iha ne’e atu koopera no tau hanoin hamutuk koana-ba oinsá dezenvolve setór finanseiru hodi suporta programa dezenvolvimentu nasionál”, dehan Governadór BCTL.
Aleinde ne’e, Sua Exelénsia Ministra Edukasaun Dra. Dulce de Jesus Soares, hateten, Ministériu Edukasaun iha responsabilidade primeiru mak fornese edukasaun ne’ebé mak ekuitativu, edukasaun ho kualidade no edukasaun inkluzivu ba labarik hotu iha Timor-Leste, nune’e dedika esforsu signifikante hodi reforsa kualidade ensinu, reforma jestaun profesór, kurríkulu, pedagojia no mós integra ICT iha edukasaun nomós iha formasaun profesór sira nian.
“Aleinde progresu ne’ebé temi tiha ona, kontinua enfrenta nafatin dezafiu infrastrutura bázika, pedagojia no jestaun eskolár ne’ebé sei menus no mós materiál didátiku sira, ho problema sira ne’e hotu, maibé ho esforsu ba servisu di’ak tebes ne’ebé dezenvolve iha institutu finanseiru liuhusi BNCT no BCTL ne’ebé konsege konsege ajuda servisu Ministériu Edukasaun nian hodi ajuda minimiza problema ne’ebé enfrenta”, S.E. dehan Ministra Edukasuan.
#MédiaME
