Aileu – Loron, Segunda-Feira, 23 Setembru 2024
Sua Exelénsia Ministra Edukasaun Dra. Dulce de Jesus Soares, hala’o abertura ba kursu formasaun espesializada iha área administrasaun no jestaun eskolár ba dirijente foun eskola nian kompostu husi Diretór Eskola, Adjuntu Diretór, Koordenadór Eskola Filiál, iha Salaun Timor Klaran, Munisípiu Aileu.
Iha entrevista, Sua Exelénsia Ministra Edukasaun Dra. Dulce de Jesus Soares, hateten, objetivu husi formasaun ne’e, la’os haree de’it ba kestasaun operasionál, maibé sei halo mós formasaun ida kle’an kona-ba administrasaun, jestaun eskolár, jestaun finanseira no mós sei ko’alia kona-ba lejislasaun sira inerente ba área edukasaun no área teknolojia informasaun no komunikasaun, nune’e bele sai dirijente eskola ne’ebé ho kualidade.
“Mezmu ita iha kurríkulu di’ak, iha livru ne’ebé mak di’ak, ita iha polítika ne’ebé di’ak, maibé xave mak dirijente eskola sir, tanba sira mak tenki implementa servisu sira ne’e hotu liuhusi apoiu edukasaun iha nivel nasionál no mós iha nivel munisipál”, dehan Ministra Edukasaun.
Governante ne’e hatutan, formasaun primeiru halo iha Munisípiu Aileu, hanesan mós pilotajen ida atu haree husi konteúdu formasaun no mós sei involve diretór eskola sira ne’ebé mak iha ona esperiénsia hodi jere eskola ho di’ak no sira ne’e rasik mak sei fó formasaun ba diretór eskola sira.
Líder edukasaun ne’e mós fó mensajen ba dirijente eskola sira atu katak tenki sai ema ne’ebé iha responsabilidade tomak atu jere sira-nia eskola no tenki sai ajente ba transformasaun edukasaun iha sira-nia komunidade rasik hodi sai ema ne’ebé mak inovativu, hanoin krítiku, analítiku hodi bele ajuda estudante sira.
Hafoin remata tiha abertura ba formasaun, Sua Exelénsia Ministra Edukasaun Dra. Dulce de Jesus Soares, hamutuk ho ekipa kontinua halo vizita ba Ensinu Báziku Filiál (EBF) Síklu 1.2. Malere Aileu hodi haree kondisaun eskola no hala’o teste ba estudante sira liga ho matéria ne’ebé aprende iha aula laran.
#MédiaME
#JornalistaPaula
