Dili, 14/05/2024 - Exelénsia Ministru Edukasaun Interinu Sr. Domingos Lopes Lemos fó pose ba professor/a rekrutadu bolsa kandidatura na’in 449 iha salaun Ian Martin INFORDEPE Matadoru Tersa-feira ne’e.
Iha diskursu Presidente Funsaun Públika Sr.Agostinho Letêncio de Deus deklara, iha serimónia ida ne’e realiza tanba ekipa hotu-hotu ne’ebé tulun iha prosesu ida ne’e akontese, hodi komisaun funsaun públika nia naran hato’o parabens ba ekipa hotu-hotu.
“Ohin ita akompaña prosesu ida ne’ebé mak kualidade transparente iha parte prosesu edukasaun iha Timor-Leste, kestaun barak-barak kona-ba komisaun funsaun publika bele asegura transparente ida ne’e ka lae? manorin-na’in ne’ebé ohin loron simu pose ne’e nuudar resultadu ida ne’ebé ita halo durante prosesu ne’e nia laran to’o ohin loron imi simu pose”.
Empozada sira tenki hanoin didi’ak manorin-na’in mak atu lori liafuan ida ne’ebé mak furak ba estudante sira, juramentu ho pose la’os serimónia ida ne’ebé mai lakon tempu de’it iha minutu hirak ne’e nia laran, juramentu katak manorin-na’in sira kompromete atu servisu duni hanesan funsionáriu publiku iha area edukasaun.
“futuru edukasaun no futuru rai ida ne’e depende ba ita-bo’ot sira nia liman, depenede ba ita- bo’ot sira nia kakutak, ba ita-bo’ot sira nia matenek atu fahe ba ita nia alin sira", katak Prezidente Fundasaun Públika ne’e.
Fatin hanesan Exelénsia Ministru Edukasaun Interinu Sr. Domingos Lopes Lemos hatutan, hein katak empoza hala’o knar ho responsabilidade no tau iha kabas vokasaun iha misaun harii edukasaun ho kualidade, manorin-na’in hatene ona knar ho responsabilidade.
“simu knar foun nuudar prófessor/a hala’o imi nia knar didi’ak ba, tanba misaun ida ne’e todan maibé ami fiar imi bele, nune’e ita bele atinji kualidade edukasaun ne’e ba futuru, futuru edukasaun iha ita-boot sira nia liman”, katak Governante ne’e.
Exelénsia ne’e hateten, manorin-na’in agora dadaun pose ne’e hanesan manorin-na’in ida ne’ebé kualidade, lei funsaun publika no lei konstituisaun RDTL hakerek ona sai funsionáriu públika iha Timor-Leste ne’ebé ho kualidade.
“Imi sira ne’ebé mak ohin pose ne’e koloka ba Munisípiu sira, husu imi atu kopera didi’ak ho imi nia prófessor/a sira, nune’e habelar tan siensia sira ne’ebé mak agora dadun sei iha imi nia kakutak habelar ba sira, fó hanoin ba sira atu nune’e ita konstrui nasaun ne’e ho edukasaun ne’ebé kualidade.
Enkuantu prófessor/a rekrutadu bolsa kandidatura ne’ebé simu pose hamutuk na’in 449 koloka ba Munisípiu sanulu resin-tolu kompostu husi Aileu na’in 30, Ainaro 39, Baucau 50, Bobonaro 67, Covalima 13, Dili 23, Ermera 70, Lautem 22, Liquiça 13, Manatuto 29, Manufahi 21, Raeoa 31, Viqueque 40.
#jornalistarita
#MédiaME
