Manatutu, Tersa-Feira 28 Maiu 2024
Sua Exelénsia Ministra Edukasaun Dra. Dulce de Jesus Soares no Sua Exelénsia Sekretáriu Estadu Ensinu Sekundáriu Jerál no Ensinu Tékniku Vokasionál Sr. Domingos Lopes Lemos hamutuk ho Prezidente Komisaun Funsaun Públika Sr. Agostinho Letêncio de Deus no dirijente sira husi Ministériu Edukasaun nian fó pose ba manorin na’in hamutuk na’in 169 ba ingresu espesiál no rejime karreira dosente iha Munisípiu Manatutu.
Iha diskursu Sua Exelénsia Ministra Edukasaun Dra. Dulce de Jesus Soares hateten, manorin sira iha devér atu halo planu no preparasaun ba aula, inklui kria materiál didátiku relevante, presiza trata estudante sira hotu ho igualdade no lahó diskriminasaun hodi buka nafatin métodu sira ne’ebé di’ak liu atu tulun estudante ida-idak no garante ninia aprendizajen.
“Ha’u kontente katak imi-nia problema ne’ebé rezolve ona, katak sei simu saláriu fulan-fulan tuir oráriu, imi agora metin ona iha sistema no hetan kondisaun sira-ne’ebé merese duni, nune’e agora halo favór konsentra ba kria relasaun respeitozu ho membru komunidade sira no relasaun domin ho imi-nia estudante sira hodi promove sira-nia susesu”, dehan S.E. Ministra Edukasaun.
Governante ne’e hatutan, manorin sira tenki halo serbisu ho dignidade ne’ebé profisaun ezije no fó ba estudante sira respeitu ne’ebé sira merese, manorin mak tenke sai ezemplu, tanba estudante sira sei aprende liu hosi imi-nia hahalok duké imi-nia liafuan.
Iha fatin hanesan Sua Exelénsia Sekretáriu Estadu Ensinu Sekundáriu Jerál no Ensinu Tékniku Vokasionál Sr. Domingos Lopes Lemos iha nia diskursu hateten, profesor sira ne’ebé mak simu ona knaar foun hanesan funsionáriu públiku presiza étika ne’ebé mak di’ak no manorin sira mak eduka ema seluk hodi sai ezemplu di’ak ba ema hotu.
“Kontribui ita-nia matenek fó ita-nia esperiénsia ne’ebé profisionál, tanba manorin na’in ne’ebé mak iha dedikasaun tomak hodi kontribui ba rai ida ne’e liuhusi hanorin ita-nia oan sira.
#MédiaME
