Aileu, Segunda-feira 27 Maiu 2024
Sua Exelénsia Ministra Edukasaun Dra. Dulce de Jesus Soares fó pose ba Profesór/a ba ingresu espesiál no rejime karreira dosente hamutuk na’in-168, serimónia ne’e realiza iha salaun Timor Klara, Munisípiu Aileu.
Iha diskursu S.E. Ministra Edukasaun Dra. Dulce de Jesus Soares hateten, Manorin di’ak ida bele hanorin ho di’ak to’o ninia turma hetan rezultadu liu fali padraun kurrikulár, maibé manorin ladi’ak ida bele lori ninia estudante sira ba kotuk, hodi atraza sira-nia aprendizajen.
״Manorin di’ak ida koñese didi’ak ninia estudante ida-idak liuliu sira-nia pontu forte, fraku, interese no personalidade no nia halo esforsu hodi tulun estudante ida-idak atu atinji ninia potensiál máximu, manorin di’ak ida sei uza ninia kriatividade atu buka solusaun no mós fuan boot atu hadomi estudante sira hotu”. Dehan S.E. Ministra Edukasaun.
Governante ne’e hatutan, manorin di’ak ida motivadu la’ós tanba saláriu ka rekoñesimentu, maibé hosi ninia orgullu bainhira estudante domina kompeténsia foun ida, ka bainhira sira envolve-an iha atividade aprendizajen ruma ho haksolok.
Iha fain hanesan S.E. Prezidente Komisaun Funsaun Públika Sr. Agostinho Letêncio de Deus akresenta, ohin momentu ida ne’ebé hatudu ba públiku parte ida husi reforma Ministériu Edukasaun nian no reforma ida la fasil no iha dezafiu oin-oin, maibé tanba desizaun forte husi Ministériu Edukasaun hodi hakotu duni dezafiu ne’ebé profesór/a sira enfrenta husi tinan 2011 to'o ohin loron.
Enkuantu partisipa iha serimónia ne’e marka prezenta Autoridade Lokál Munisípiu Aileu, Diretór Servisu Edukasaun Munisípiu Aileu, Komandante PNTL Munisípiu Aileu, Família no kolega husi emposadu no emposada sira.
#jornalistapauladelgado
#MédiaME
