Dili, 10 Janeiru 2023 (SAPIENTIA)-Familia Estudante hosi Postu Administrativu Iliomar, Munisipiu Lautem, husu ba Ministeriu Edukasaun, Juventude no Desportu (MEJD), atu rigor haree valor mellor klasifikadu estudante atu asesu ba programa bolsa meritu, nune’e bele konsidera esforsu estudante sira.
Sonia Seixas Miranda, nuudar bin hosi estudante Anilcia Waruday Magno da Silva, ne’ebe eskola iha Ensinu Sekundariu Jeral (ESJ) Katolika Sao Joao Paulo II Iliomar, sente la satisfas tanba nia alin rasik hetan valor di’ak ka tama kategoria mellor klasifikadu atu hetan bolsa meritu, maibe parte eskola rasik hasai nia alin nia naran hodi la hetan, enkuantu bazeia ba matadalan, eskola sira maka soma valor estudante sira atu hetan bolsa meritu.
“Estudante ho klasifikasaun di’ak maka hetan bolsa meritu, maibe momentu profesor sira halo selesaun ba estudante ne’ebe maka hetan valor di’ak, haruka naran ba Munisipiu ne’e laloos alin nia naran mos tama hotu tanba alin nia valor di’ak no merese atu hetan, maibe alin nia kolega sira ne’ebe hetan valor kiik liu hosi alin maka hetan fali mellor klasifikasaun, hau nia alin rasik la hetan, ida ne’e ami sente la satisfaaz,” Sonia Seixas, haktuir ba Agencia Tatoli Via telefonika.
Relasiona ho nia alin la hetan bolsa meritu, iha loron 22 Dezembru 2022, Sonia Seixas ba halo konfirmasaun iha eskola ESJ Katoloka Sao Joao Paulo II Iliomar no hasoru adjuntu eskola hodi hatudu matadalan bolsa meritu inklui nia alin nia kaderneta eskola.
“Hau haree alin nia notas ne’e bele hetan bolsa meritu tanba nia valor iha ezame periodu dahuluk hetan III lugar ho valor 111, ezame periodu daruak hetan II lugar ho valor 111, no ezame periodu datoluk hetan III lugar ho valor 110. ho ida ne’e loloos nia bele hetan, maibe alin la hetan nafatin,” nia akresenta.
Familia estudante ne’e dehan, bainhira halo komparasaun valor estudante seluk ne’ebe hetan bolsa meritu, iha estudante ida, Denita Ermianti Fernandes, ho nia valor iha ezame periodu dahuluk hetan valor 109, ezame perodu daruak ho valor 106 no ezame periodu III ho valor 111, enkuantu estudante Georgina Ledi Diana Barreto, ne’ebe hetan bolsa meritu nia valor ba ezame periodu dahuluk 111, periodu daruak 109 no periodu datoluk 110.
Haree hosi valor ne’e, loloos hau nia alin mos bele hetan tanba nia kolega nia valor kiik liu nia, maibe Adjuntu hatan estudante ne’ebe hetan bolsa meritu ne’e tanba parte eskola soma ona valor, nune’e hau hatan se somativu entaun hau nia alin mos bele hetan tanba haree hosi valor, hau nia alin valor liu hela kolega rua seluk,” Sonia tenik.
Nune’e, nia parte tenta husu kaderneta estudante rua seluk ne’ebe hetan bolsa meritu ba parte profesor atu haree sira nia valor, nune’e bele halo komparasaun ho ninia alin nia valor.
“Buat ne’ebe akontese maka profesor sira uza fali tipe x riska hotu valor sira hanesan 7 muda fali ba 9 no nia total ne’e muda hotu hodi halo manipulasaun valor sira hanesan tiha alin nia valor. Nune’e, alin nia kolega sira maka hetan fali bolsa meritu, enkuantu alin rasik la hetan tanba razaun alin nia aman serbisu, ida ne’e laiha razaun forte tanba programa Governu ne’e fo la haree ba profisaun inan-aman nia.”nia la menta.
Kestaun ne’e Sonia konsidera iha ona manipulasaun tanba kaderneta ne’e nuudar dokumentu importante ida.
“Ita labele uza tipex atu riska tun sa’e tuir ita-nia hakarak, hau koko hasoru Diretor Eskola maibe hatan katak bainhira hau la satisfeitu ho rezultadu ne’ebe iha, entaun haruka hau hasoru Diretor Edukasaun Munisipiu, maibe Diretor hatan dehan, sira laiha kompetensia atu fo solusaun ba eskola Katolika sira, maibe ba de’it eskola Publika,” nia konta tuir.
Nune’e, Diretor Edukasaun Munisipiu Lautem haruka familia estudante ne’ebe la simu ho rezultadu, hodi halo justifikasaun razaun la simu ho rezultadu.
“Hau ba hasoru fali Diretor Eskola atu halo justifikasaun ba alin la liu bolsa meritu, maibe Diretor Eskola okupadu no dehan iha tinan foun Janeiru 2023 mak atu halo justifikasaun, maibe ikus mai laiha solusaun. Ami husu Ministeriu Edukasaun, Juventude no Desportu atu tau atensaun makaas, nune’e labele iha manipulasaun hodi estudante ne’ebe merese atu hetan ne’e tenke hetan tanba nia iha direitu,” nia dehan.
Media. Sapientia. Bosco
