Díli, kuarta-feira, 24-07-2024
Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos halo abertura formasaun ba Superientendente no Inspektór eskolár foun sira ho tema asegura legalidade kontrolu, Auditoria, Avaliasauan no fiskalizasaun iha funsionamentu sistema Edukativu, iha Salaun INFORDEPE Matadoru.
Iha intervensaun Exelénsia Sekretáriu Estadu ESJ-ESTV hateten, simu kargu nudar Superientendente no Inspektor tuir formasaun ida ne’e importante tebetebes, ne’e hanesan matéria importante ida fó hanoin ba ita atu halo transformasaun Edukasaun iha ita nia presiza servisu makas, nune'e bele mellora, hadi'ak liu tan Edukasaun iha Timor-Leste.
"Papél kontrolu no fiskalizasaun ne’e importante tebetebes, husu ba Superientendente no Inspektór sira tun ba baze nune'e bele hatene servisu sira iha baze, servisu tenke kopera ba malu, labele servisu mesak", dehan Sua Exelénsia Sekretáriu Estadu ESJ-ESTV
Sua Exelénsia Sekretáriu Estadu ESJ-ESTV hatutan tan, oradór sira ohin loron fahe matéria ba Superientendente no Inspektór eskolár foun sira hanesan bukae ida nune'e bele implementa iha baze, hodi mellora di'ak liu tan servisu Edukasaun iha baze.
"Imi bele foun iha kareira maibé la'ós foun iha Edukasaun, imi hatene di'ak servisu Edukasaun nian, presiza servisu hamutuk hodi aumenta imi koñesimentu iha baze, Inspektór eskolár sira labele sai inimigu ba Profesór sira maibé sai parseiru ne'ebé di'ak hodi fó hanoin ba Profesór sira".
Formasaun ba Superientendente no Inspektór eskolár foun sira ne'e mai husi Munisípiu sanulu-resin-tolu (13) inklui Oe- Cussuse, Sua Exelénsia simbolikamente entrega motorizada ualu nulu resin-neen (86) ba Inspektór eskolár foun sira.
Abertura formasaun ne’e partisipa mós husi reprezentante husi Prezidente INFORDEPE, reprezentante Komisaun Funsaun Públika, Representante Unicef, Ministériu Públiku no Dirijente Ministériu Edukasaun nian.
#MédiaME
