Ainaro, 30/08/2024; Prezidente Komisaun Organizadora ba komemorasaun 12 Novembru husi Ministériu Edukasaun Sra. Odilia das dores Ung Martins, akompaña husi asesora Gabinete Ministra Edukasaun Jacinta Hanjam Corbafo ho Xefe Departamentu Diresaun Nasionál Sistema Informasaun no Teknolojia Sr. Leonardo de Araújo, hala’o enkontru ho Prezidente Autoridade Munisípiu Ainaro Sra. Manuela Georgina Corte-real, hodi ko’alia kona-ba preparasaun ba komemorasaun loron istóriku 12 Novembru tinan 2024 iha Munisípiu Ainaro, ho tema “Orgulhu ho Ita-nia Istória no Hamutuk Dezenvolve Ita-nia Nasaun ida Prósperu iha Futuru.”
Ministériu Edukasaun inísia hodi selebra loron istóriku ida ne’e hamutuk ho estudante, manorin no komunidade sira hodi relembra fali ba jerasaun foun sira kona-ba tragedia 12 de novembro 1991.
Iha enkontru ne’e, Prezidente Komisaun Organizadora ba komemorasaun 12 Novembru iha Ainaro Sra. Odilia das Dores Ung Martins hateten, tinan ida ne’e Ministériu Edukasaun hanoin atu halo serimónia loron 12 fulan Novembru iha Ainaro, tanba Ministériu Edukasaun iha inisiativa atu hatutan istoria luta joventude TL iha okupasaun Indonesia ba ita-nia jerasaun foun sira, hanesan saida maka ME halao ona iha tinan 2023 iha Munisipiu Viqueque.
“Objetivu husi selebrasaun ne’e, atu joven liu-liu estudante sira hatene kona-ba oinsá jovem sira nia kontribuisaun ba dezenvolvimentu rai ida ne'e depois de ukun rasik an.
Ho nune’e mak selebrasaun 12 Novembru ida ne’e, ita selebra ho nia tarjetu ba estudante, profesór, autoridade lokál sira, atu bele envolve iha selebrasaun ida ne’e”. Bodik Prezidente KO
Aleinde ne’e, Prezidente Autoridade Munisípiu Ainaro Sra. Manuela Georgina Corte-real mós dehan, sira-nia parte sente kontente, tanba Ministériu Edukasaun bele hili Munisípiu Ainaro hodi halo selebrasaun ba komemorasaun loron 12 Novembru 2024.
Hafoin remata tiha enkontru ho PAM Ainaro, Diretora Jerál Planu Polítika, Inkluzaun no Informasaun Sra. Odilia das dores Ung Martins, akompaña husi Asesora Gabinete Ministra Edukasaun Jacinta Hanjam Corbafo no Xefe Departamentu Diresaun Nasionál Sistema Informasaun no Teknolojia Sr. Leonardo de Araújo, hala’o fila-fali enkontru ho Amo Vigáriu Pároquia Ainaro, Pe. Eugénio Redentor hodi koa’alia kona-ba selebrasaun 12 novembro nebe sei loke ho misa iha dadersan no halo reflesaun iha parte lokraik.
Reflesaun sei halo ba estudante, profesór no autoridade lokál sira, nomos komunidade nebe maka sei partisipa iha komemorasaun refere.
Iha oportunidade ne'e mos ekipa KO halo observasaun ba fatin komemorasaun 12 Novembru 2024 iha kampu Futeboll Munisípiu Ainaro.
Fó hanoin fali katak, Komemorasaun Masakre 12 Novembru 1991 tinan ne’e halo ba Dala-33 no Selebrasaun loron Nasionál Juventude tinan ne’e halo ba Dala-19.
#MédiaME
