Díli - Loron Kuarta-Feira, 30 Outubru 2024
Konsellu Ministrus hala'o sorumutuk iha Palasiu Governu, iha Dili, no aprova ona ezbosu Rezolusaun Governu nian ne'ebé, to'o loron 10 fulan-abril tinan 2025, hodi suspende hanorin, aprendizajen no prátika arte marsiais no taka temporáriu fatin no instalasaun hotu-hotu ne'ebé atu hanorin, aprende no prátika arte marsiais ne'ebé inisialmente aprova ona iha Rezolusaun Governu no. 45/2023, loron 10 fulan-novembru, no estende liuhusi Rezolusaun Governu nú. 17/2024, 24 Abril.
Rezolusaun Governu ne'e ninia objetivu mak atu konsolida no reforsa pás sosiál ne'ebé hetan ona dezde Novembru 2023. Ho aprosimasaun ida-ne'ebé konsidera no kontrola, iha futuru, hakarak atu permite prátika arte marsiais nian iha kontestu desportivu de'it hodi promove ezersísiu saudavel no kontribui ba edukasaun no formasaun sívika no umanista ba foin-sa'e sira. Maske nune'e, iha momentu ne'ebá sei iha suspensaun ba hanorin, aprendizajen no prátika arte marsiais no taka tiha ona instalasaun sira-ne'e.
Governu kongratula populasaun, liuliu foin-sa'e sira, tanba sira-nia kolaborasaun hodi kumpre Rezolusaun Governu nian nú. 17/2024, loron 24 fulan-abril, ne'ebé kontribui maka'as ba manutensaun orden no pás sosiál iha nasaun laran tomak.
#MédiaME
