Dili - Segunda-feira, loron 04 fulan Novembru tinan 2024
Ministériu Edukasaun liuhusi Diretora Jeral Planu, Polítika, Inkluzaun no Informátika (DGPPII) Sra. Odilia das Dores Ung Martins halo abertura ba formasaun lian Inglés ba manorin nain 20 iha sentru formasaun ETDA, Fatuhada, Dili.
Iha okaziaun ne’e, DGPPII Sra. Odília das Dores Ung Martins hateten, “Reprezenta Ministra Edukasaun, iha oportunidade ida ne’e, hau hakarak hato’o agradese no apresia ba SEAMEO ho ekipa ne’ebé realiza formasaun ida ne’e no agradese mos kooperasaun ne’ebé tebes, ba formandu sira hau espera ita-bo’ot bele aproveita oportunidade ne’e ho di’ak”
Aleinde ne’e, reprezentante SEAMEO RELC hanesan mos formador Dr. Roby Marlina hateten, “Reprezenta SEAMEO RELC hau hakarak agradese ba Ministériu Edukasaun Timor Leste ba servisu hamutuk ida ne’e, hau orgullo tebes bele marka prezensa iha ne’e hodi hasoru malu manorin sira husi nasaun furak ida ne’e, maske husi Singapura mai to’o dook uitoan maibé ida ne’e oportunidade furak ida hodi dada lia ho sira, no antuziazmu tebes atu servisu hamutuk ho manorin sira hau espera kooperasaun servisu ho Ministériu Edukasaun Timor Leste bele la’o nafatin no di’ak liu tan”
Entertantu programa formasaun ne’e hanesan vantajen diak ida ba Timor Leste liu husi Ministériu Edukasaun ne’ebé hanesan membru SEAMEO no iha priviléjiu atu hetan formasaun husi formador kualifikadu internasional sira no sei iha mos oportunidade barak liu tan ba manorin sira atu tuir formasaun iha liur maibe presiza iha koñesimentu lian Inglés ho di’ak.
Formasaun ne’e sei la’o durante loron 5 no partisipa husi formandu manorin na’in 20.
