RAEOA - Domingo, 17/11/2024
Ministériu Edukasaun realiza sertame finál nível nasionál entre estudante 3° siklu Ensinu Báziku iha âmbitu ba komemorasaun loron istóriku loron proklamasaun Unilateral independénsia Timor Leste ba dala-49 iha Salaun Oe-Upun, Rejiaun Administrativa Espesiál Oecusse Ambeno (RAEOA).
Sertame finál nível nasionál entre estudante 3° siklu Ensinu Báziku ne'e kompostu husi vensedor Rejiaun ha'at, mak hanesan husi Rejiaun Leste EBC 3° siklu Lulira, Lospalos, Lautem, Rejiaun Oeste EBC 3° siklu 20 de Agusto, Ermera, Rejiaun Sentrál Dili Oeste EBC 3° siklu Manleuana, Rejiaun Sul EBC 3° siklu Diligénsia Letefoho, Same, Manufahi.
Iha okaziaun nee, Prezidente Autoridade RAEOA em ezersísiu Sr. Andre Lao iha diskursu hateten, “Atividade sertame nee importante tebes tanba hanesan modalidade ida atu hasae koñesimentu no kapasita estudante sira atu nunee bele hatene ita nia loron istóriku sira, setór edukasaun mak xavi ba dezenvolvimento tanba liu husi atividade importante ida nee atu bele hasae kapasidade rekursu umano iha Timor Leste ho kompetisaun ida nee hanesan forma ida hodi ajuda estudante sira oinsa bele hariku sira nia koñesimentu báziku kona-ba konteúdo ne'ebé sira aprende ona iha sala de aula"
Entretantu, Diretór Jerál Edukasaun Pré-Eskolár, Ensinu Báziku no Ensinu Rekorrente (DG EPEER) Sr. Apolinário Serpa Rosa hateten, Objetivu husi atividade sertame ida nee maka atu sukat ita nia oan estudante sira nia kapasidade koñesimentu sientífiku no linguístiku iha valor síviku, no atividade sertame ne'e sei sai atividade rotina"
Aleinde ne'e, Sekretária Rejional Edukasaun no Asunto Sosiál RAEOA, Sra. Inácia Tamele hateten iha ninia diskurso, "Liu husi kompetisaun ida ne'e hodi dezenvolve estudante sira nia kompreensaun no koñesimentu sientífiku, linguístiku no valor síviku hodi kontribui ba hadi'a kualidade Ensinu no aprendizajen. Sertame ida ne'e mos atu enkoraza estudante sira bele estuda makaas liutan tuir sira nia talentu idak-idak. Liu husi sertame ida ne'e mos sai sasukat ida ba Ministériu Edukasaun ba produsaun kualidade Ensinu aprendizajen nian. Nu'udar membru Nonu Governu rejionál RAEOA sempre apoiu 100% ba kualker atividade hodi hadi'a kualidade Ensinu no aprendizajen. Tanba atu dezenvolve Rai doben Timor-Leste presiza ema matenek barak no iha abilidade iha aspetu oin-oin, hirák nee hotu nia hun no abut mak edukasaun”
Iha sertame finál nível nasionál entre estudante 3° siklu Ensinu Báziku ne'e, EBC 3° siklu Diligénsia, Letefoho, Manufahi mak sai hanesan vensedor primeiru lugar ho totál valor 1.450 Pontus, Segundo lugar husi EBC 3° siklu Lulira, Lospalos, Lautem ho valor 1.325 pontus. Terseiro lugar husi EBC 3° siklu 20 de Agusto Ermera ho valor 700 Pontus no quarto lugar okupa husi EBC 3° siklu Manleuana Dili, ho valor 525 pontus.
Portantu, Sertame finál nível nasional 3° siklu Ensinu Báziku ne'e abertura husi Prezidente Autoridade RAEOA em ezersísiu, Sr. Andre Lao no ensera husi Diretór Jerál Edukasaun Pré-Eskolár, Ensinu Báziku no Ensinu Rekorrente (DG EPEER) Sr. Apolinário Serpa Rosa.
#MédiaME
