Díli – loron segunda-feira, 02 Setembru 2024
Sua Exelénsia Ministra Edukasaun Dra. Dulce de Jesus Soares, hamutuk ho dirijente sira Ministériu Edukasaun nian, realiza serimónia isár Bandeira RDTL ba loron dahuluk fulan setembru tinan 2024 nian. Iha ámbitu serimónia isár Bandeira RDTL ne’e, S.E. Ministra Edukasaun, agradese no fó parabéns ba dirijente sira inklui profesór sira, tanba bele organiza ona estudante sira hodi komemora loron konsulta populár 30 agostu 1999 ba dala-25, iha eskola sira territóriu laran tomak.
Iha diskursu, Sua Exelénsia Ministra Edukasaun Dra. Dulce de Jesus Soares, hateten, agradese ba dirijente hotu Ministériu Edukasaun nian husi nasionál to’o baze inklui profesór sira, tanba tau ona esforsu tomak iha tinan ida ne’e hodi halo taividade kona-ba komemorasaun loron konsulta populár, 30 agostu 1999 ba dala-25 iha eskola sira territóriu laran tomak.
“Eskola barak tebe-tebes mak halo atividade komemorasaun loron 30 agostu 1999 ba dala-25 ne’e, inklui mós iha Díli konsege atrai xefe UNAMET Sr. Ian Martin nia atensaun ho nia membru sira, hodi mai partisipa iha teatru ida ne’ebé mak tama hotu iha programa nasionál ne’ebé hala’o iha INFORDEPE hodi hanoin hikas fila-fali akontesimentu iha tempu pasadu”, dehan Ministra Edukasaun.
Governante ne’e hatutan, atividade sira ne’e la’os hotu iha ne’e de’it, maibé kontinua organiza, nune’e, estudante sira ne’e la’os de’it aprende iha sala-laran, maibé sira mós bele tau iha prátika kona-ba siénsia ne’ebé aprende iha aula-laran.
“Ita agradese mós ba sasin sira ne’ebé mak konsege mai fó duni esperiénsia iha 30 agostu 1999, konsege halibur ita nia ina-aman no maun alin sira hodi fahe esperiénsia ba estudante sira no esperiénsia ne’e la’os konta de’it, maibé hotu-hotu dokumenta, nune’e bele sai fali livru referénsia ba matéria istória iha eskola sira”, dehan Ministra Edukasaun.
Iha oportunidade ne’e mós, governante ne’e husi ba funsionáriu Ministériu Edukasaun tomak, inklui profesór no estudante sira nivel sekundáriu hotu iha territóriu laran tomak atu orbigatóriamente hola parte iha vizita Sua Santidade Papa Francisco iha Tasi-Tolu.
#MédiaME
