Dili, Segunda-feira 25/03/2024- Exelénsia Ministru Edukasaun Interinu Sr. Domingos Lopes Lemos hala'o audiénsia ho Diretór Ezekutivu Centro Audiovizuál Max Stahl Timor-Leste (CAMSTL) Sr. Eudicitio Pinto ho ekipa aprezenta planu programa Audiovizuál hodi loke filmajen kona-ba prosesu luta ukun rasik-an nian ba Estudante Ensinu Sekundáriu Jerál no Komunidade sira iha Munisípiu.
Iha diskusaun Diretór Ezekutivu CAMS-TL Sr. Eudicitio Pinto hateten, agradese ba Exelénsia Ministru Edukasaun Interinu bele disponibiliza tempu no fó autorizasaun hodi ekipa CAMS-TL bele apresenta planu programa implementasaun atividade sira, atu nune'e iha futuru CAMS-TL no Ministeriu Edukasaun, bele servisu hamutuk hodi partilla informasaun ba estudante no komunidade sira, ne’ebé liga ho istória rezistensia nian no materia Audiovisual.
"Programa Audiovizuál atu loke filmajen kona-ba prosesu luta ukun rasik-an nian ba Estudante no Komunidade sira hodi harmoniza memória no valoriza heroi sira nia Luta".
CAMS-TL nia Planu Estrategia ba longo prazu mensiona mos konaba kontinuasaun programa "Istória ba Ema hotu" neʼebé tuir planu sei kontinua implementa iha eskola husi kada munisipiu sira.
Fatin hanesan Ministru Edukasaun Interinu Sr. Domingos Lopes Lemos reafirma, nia parte apresia tebetebes ba CAMS-TL nia programa refere, prontu apoiu, nune'e jerasaun foun bele hatene istória pasadu nian. Nomos ho atividades CAMS-TL nian, direta no indiretamente bele kuda, haburas no hametin estudante ho komunidade sira nia sentimentu Nasionalizmu no patriotizmu, husi ne'e bele ajuda kontribui ona ba rai nia hakmatek no dezenvolvimentu.
" Imi nia programa ne'e di'ak tebetebes, ita presiza serbisu hamutuk nune'e tun ba baze labele mosu duvida no dezintendimentu, ita mos presiza servisu hamutuk ho Diretór Edukasaun Munisípiu sira no profesór sira nune'e servisu ne'e la'o di'ak", katak Governante ne'e.
Enkuantu tuir ajenda programa refere sei realiza iha fulan Maio nia laran hafoin estudante sira remata ezame primeiru trimestral.
#jornalistarita
#MédiaME
