Díli - Loron 10 fulan Outubru tinan 2024
Sua Exelénsia Ministru Edukasaun Interinu Sr. Domingos Lopes Lemos, akompaña husi Diretór Jerál Ensinu Sekundáriu no dirijente Ministériu Edukasaun nian distribui materiál Ezame nasionál tinan 2024 ba Diretór Edukasaun Munisípiu sanulu resin-rua inklui RAEOA, iha salaun konferénsia Ministériu Edukasaun Vila-Verde, Sexta-feira ne’e.
Iha intervensaun Sua Exelensia Ministru Edukasaun Interinu Sr. Domingos Lopes Lemos, husu ba profesor/a sira atu akompaña prosesu ezame nasionál ne’e to’o remata, nune’e ezame nasionál tinan 2024 ne’e la’o ho susesu.
“Nu’udar Ministru Edukasaun Interinu, ha’u hakarak atu imi bele hetan rezultadu ne’ebé brillante iha Ezame Nasionál. Hatudu katak imi bele liu Ezame Nasionál ho susesu, prepara imi-nia an ho di’ak atu tuir Ezame Nasionál ne’ebé besik daudaun ona. Imi-nia rezultadu aprendizajen durante tinan 9 iha Ensinu Báziku no tinan 3 iha Ensinu Sekundáriu sei sukat liuhosi prova ne’e,” hateten Governante ne’e.
Estudante sira ne’ebé atu tuir ezame nasionál tinan 2024 hamutuk na’in 58.271, kompostu husi 3o siklu Ensinu Báziku 29.252, Ensinu Sekundáriu Jerál 24.894, Ensinu Sekundáriu Tékniku Vokasionál 4.125
#MédiaME
