MINISTRA EDUKASAUN HO SEKRETÁRIU ESTADU ENSINU SEKUNDÁRIU JERÁL NO ENSINU TÉKNIKU VOKASIONÁL PARTISIPA IHA JORNADA ORSAMENTU 2024
Dili, 12-09-2023- Ministra Edukasaun Dra. Dulce de Jesus Soares ho Sekretáriu Estadu Ensinu Sekundáriu Jerál no Ensinu Tékniku Vokasionál Sr. Domingos Lopes Lemos partisipa iha Jornada Orsamentu, preparasaun Orsamentu Jerál Estadu ( OJE) 2024 iha Auditórium Xanana room, Torre Ministériu Finansas Aitarak Laran.
Iha abertura Jornada Orsamentu tinan 2024 ne'e, Primeiru Ministru Kay Rala Xanana Gusmão dehan, Edukasaun kontinua hanesan prioridade ida ba governu, tanba futuru Timor-Leste nian iha joven sira-nia liman, tanba ne'e mak responsabilidade mak atu fó ba sira kompeténsia ho kuñesimentu nesesáriu atu sira bele hetan susesu.
"Investimentu iha edukasaun aléinde aumenta kapitál umanu sei kontribui mós hodi reduz taxa dezempregu no pobreza, tamba ne'e sei konsentra iha melloria kualidade edukasaun, iha promosaun, formasaun profisionál no iha garantia oportunidade ne'ebé hanesan ba ema hotu-hotu, la haree ba sira-nia origen ka lokalizasun geográfika", dehan Xefe Governu.
Primeiru Ministru Kay Rala Xanana Gusmão husu atu implementasaun ho susesu husi orsamentu 2024 ne'e ezije kolabora ho envolvimentu husi parte hotu-hotu inklui governu, setór privadu, organizasaun husi sosiedade sivil no sidadaun sira hotu kontinua servisu hamutuk atu atinji futuru ida ne'ebé nabilan liu.
Iha fatin hanesan Ministra Edukasaun Dra. Dulce de Jesus Soares lihusi entrevista esplika, programa prioridade Ministériu Edukasaun iha governu da-sia mak Ministériu Edukasaun kontinua iha nível ensinu, Edukasaun pre-eskolár, ensinu báziku, ensinu sekundáriu tékniku Vokasionál no mós programa sira seluk hodi apoiu ba programa prosesu aprendizajen atu bele la'o ho di'ak hodi hadi'a kualidade edukasaun iha Timor Leste.
