MINISTRA EDUKASAUN HO EKIPA TÉKNIKA NO DIRETÓR KOMPAÑIA KO’ALIA KONA-BA PROGRESU KONSTRUSAUN EDIFÍSIU ESKOLA

Dili, 04/08/2023 – Ministra Edukasaun Dra. Dulce de Jesus Soares hala’o enkontru ho ekipa téknika no diretór kompañia sira hodi ko’alia kona-ba progresu konstrusaun edifísiu eskola sira iha rai-laran, enkontru ne’e hala’o iha salaun konferénsia Ministériu Edukasaun Vila-Verde.

Iha enkontru ne’e Ministra Edukasaun Dra. Dulce de Jesus agradese tebes ba kompania sira, tanba barak mak kompleta ona servisu atu bele garante kualidade edukasaun liuhusi infrastrutura.

"Objetivu husi enkontru ne'e simplesmente hau hakarak ko'alia ho señor/a sira, tanba hau tama mai haree infrastrutura, nune'e Ministériu Edukasaun sempre hetan problema bo'ot liu mak sala aula nian, tanba ne’e mak oinsá haree tau orsamentu ba futuru kontinua responde ba situasaun ne’e", dehan Ministra Edukasaun.

Governante ne’e mós husu ba kompañia sira atu kumpri regra sira ne’ebé estabelese atu bele aselera konstrusaun edifísiu eskola hodi estudante sira bele uza hodi aprende.