Díli – Segunda-Feira, 15 Jullu 2024
Sua Exelénsia Ministra Edukasaun Dra. Dulce de Jesus Soares hala’o enkontru ho Sua Exelénsia Governadór Banco Central Timor-Leste (BCTL), Sr. Helder Lopes, hodi ko’alia kona-ba oinsá bele promove edukasaun finanseira iha Timor-Leste liuhusi akordu entre ME ho BCTL.
Iha entrevista ne’e, Sua Exelénsia Ministra Edukasaun Dra. Dulce de Jesus Soares hateten, parte husi Ministériu Edukasaun fó kontinuidade ba servisu ne’ebé mak halo tiha ona iha tinan hirak liubá, tanba ne’e ohin diskute hodi kontinua reforsa programa ne’e no mós buka meiu atu habelar liután ba eskola sira.
“Meiu sira ne’ebé Ministériu Edukasaun halo, liuhusi formasaun ba manorin sira no implementasaun ba eskola sira no mós halo monitorizasaun liuhusi ekipa konjunta ida entre Ministériu Edukasaun no Banco Central rasik”, dehan S.E. Ministra Edukasaun.
Governante ne’e hatutan, Ministériu Edukasaun asume responsabilidade tomak atu kontinua halo programa edukasaun literasia finanseira iha eskola sira iha nivel ensinu hotu-hotu no dadaun ne’e rejista ona eskola hamutuk atus rua (200), maibé avaliasaun iha tinan ikus ne’e iha posibilidade bele aumenta tan ba oin liuhusi kooperasaun ho BCTL.
Iha fatin hanesan, Sua Exelénsia Governadór Banco Central Timor-Leste (BCTL), Sr. Helder Lopes hateten, programa edukasaun finanseira ne’e importante, tanba bele fó koñesimentu báziku kona-ba oinsá atu jere iha nivel individu, umakain no mós organizasaun, nune’e bele tulun hadi’a moris loron-loron nian ho rekursu finanseiru ne’ebé iha.
“Ami husi Banco Central agradese tebes ba Exelénsia Ministra Edukasaun, tanba kontinua hatudu komitmentu no komprimísiu hodi servisu hamutuk ho Banco Central hodi nafatin promove edukasaun finanseira iha ita-nia rai, atu bele fó benefísiu la’os de’it iha tempu agora, maibé bele fó mós koñesimentu ba labarik sira hodi aplika iha futuru”, dehan S.E. Governadór BCTL.
#jornalistaluis
#MédiaME
