Baucau - Loron Kinta-Feira, 28 Novembru 2024
Sua Exelénsia Ministra Edukasaun Dra. Dulce de Jesus Soares, sai inspetora ba serimónia isár Bandeira RDTL iha ámbitu komemorasaun loron proklamasaun independénsia ba dala-49 ho tema "Orgullu ba ita nia Identidade no Kultura ita Harii Futuru Liberdade Justisa no Esperansa ba ita nia Povu", iha Munisípiu Baucau.
Hafoin remata tiha serimónia isár Bandeira RDTL, iha entrevista, Sua Exelénsia Ministra Edukasaun Dra. Dulce de Jesus Soares, hateten, serimónia isár Bandeira iha ne'e, la’o di'ak tebes, tanba hetan partisipasaun máximu husi instituisaun F-FDTL, PNTL, Veteranu, Eskuteiru, Estudante, Profesór no komunidade tomak.
"Husi serimónia ida ne'e bele fó liután forsa, korajen, paz atu bele servisu hamutuk hodi bele dezenvolve ita-nia rai. No fó onra no omenajen ba ita-nia eroi sira ne’ebé fó ona sira-nia vida ba ukun rasik-an, tanba ne’e ita sira ne’ebé sei moris, ita-nia servisu mak tenki priense ukun rasik-an ida ne'e atu bele atinji mehi ne'ebé ita-nia eroi no eroina sira hakarak", dehan Ministra Edukasaun.
Governante ne’e hatutan, hakarak fó parabéns ba Sua Exelénsia Prezidente Repúblika, ne'ebé mak promulga tiha ona Orsamentu Jerál Estadu tinan 2025 iha loron hirak liubá i Ministériu Edukasaun hetan alokasaun orsamentu OJE 2025 nian, hamutuk Milloens $ 113 ba programa 5, hanesan, dezenvolvimentu institusionál, programa pré-eskolár, ensinu báziku, ensinu sekundáriu jerál no tékniku vokasionál no ensinu rekorente.
Ho alokasaun orsamentu OJE 2025 ne'e, ho esperiénsia no programa ne'ebé mak iha, fiar katak sei kontinua lori edukasaun ba oin, inklui mós infrastrutura ne'ebé sai mós hanesan prioridade ba governu konstitusionál da-9 liuhusi Ministériu Edukasaun.
#MédiaME
